Kryeministri Edi Rama ka komentuar sot në një komunikim me qytetarët lidhur me mbylljen e aplikacionit TikTok dhe procesin e konsultimeve të realizuara me prindërit dhe mësuesit, duke theksuar se ky vendim nuk është i lidhur me asnjë lloj censurë, por me një nevojë për të mbrojtur fëmijët. Rama theksoi se në këto konsultime me 65 mijë prindër dhe mësues, një shumicë e madhe ka mbështetur mbylljen e TikTok, pa marrë parasysh orientimin politik të tyre. Sipas tij, edhe ata që nuk votojnë për PS-në, kanë vendosur interesat e fëmijëve para çdo interesi partiak.
“Këtu nuk bëhet fjalë për tifozllëk partiak, por për fëmijët e Shqipërisë,” tha Rama. Ai theksoi se vendimi është marrë duke u mbështetur në interesat më të larta të shoqërisë, duke u siguruar që askush të mos e keqpërdorë këtë çështje për motive politike. Rama u shpreh gjithashtu se PS-ja ka fituar besimin e shumicës dhe do të marrë një mandat të fortë për të ecur përpara me proceset integruese të Shqipërisë në Bashkimin Europian.
Në një tjetër moment të fjalës së tij, Kryeministri përdori batuta ironike për të sulmuar liderin e PD, Sali Berishën. “Nuk është censurë, por mbrojtje. Nuk është çmenduri, por gjëja më e shëndetshme për të mbrojtur fëmijët,” tha Rama, duke e krahasuar mbylljen e përkohshme të TikTok me një masë të domosdoshme për sigurinë e përdoruesve të rinj. Ai theksoi gjithashtu se është e nevojshme që kompania e TikTok të paraqesë një plan konkret për të vendosur filtra që do të sigurojnë përdoruesit nga bullizmi dhe do të stimulojnë zhvillimin e përmbajtjeve edukative.
Rama nuk kurseu ironinë e tij ndaj Berishës, duke e etiketuar atë si një “buf të kënetës” dhe duke sugjeruar që çdo kritikë e tij nuk ka bazë të shëndoshë. “Mos dëgjo bufin, se të ha,” tha ai, duke shtuar se Berisha ka vendosur veten në piedestal, por pa asnjë bazë të fortë. Ai gjithashtu iu drejtua qytetarëve me një thirrje për të kontribuar në largimin e “kënetës”, duke i inkurajuar ata të mos e ndjekin figurën e tij, që sipas Ramës, nuk ka asnjë ndikim pozitiv për shoqërinë.
Në përfundim, Kryeministri përsëriti se masat që po merren janë për të siguruar një përdorim më të sigurt dhe edukativ të internetit për fëmijët dhe të rinjtë, duke e konsideruar këtë një hap të rëndësishëm për mbrojtjen e ardhmërisë së Shqipërisë.
