Edi Rama akuzon policinë për dënime absurde ndaj qytetarëve të thjeshtë, ndërsa ndërtues të mëdhenj kanë ngritur kate pa leje në mes të kryeqytetit.
Kryeministri Edi Rama prezantoi ministren e re të Brendshme, Albana Koçiu, duke shfrytëzuar rastin për të lëshuar një sërë kritikash të ashpra ndaj Policisë së Shtetit. Ai kërkoi që kontrolli i territorit dhe lufta kundër ndërtimeve pa leje të marrin një drejtim të ri.
Në fjalën e tij, Rama theksoi se policia nuk mund të fshihet më pas institucioneve të tjera, pasi ka marrë përgjegjësi të drejtpërdrejtë për parandalimin dhe ndëshkimin e abuzimeve në sektorin e ndërtimit. Ai kujtoi se deri pak kohë më parë, organet e rendit shpesh ishin pjesë e problemit.
Kryeministri solli shembuj të situatave absurde ku qytetarë të thjeshtë janë gjobitur për mure apo riparime minimale, madje edhe të moshuar që kanë përfunduar në prokurori e gjykatë për ndërhyrje të vogla. Ndërkohë, sipas tij, në qendër të Tiranës, objekte gjigante si “Syri i Tiranës” kanë ngritur kate pa leje pa u penguar.
“Një burrë 90-vjeçar është trajtuar si ndërtues i paligjshëm për një riparim të vogël matanë Dajtit, ndërkohë që kulla shumëkatëshe kanë shtuar kate të tëra pa leje në mes të qytetit,” deklaroi Rama me ironi.
Ai theksoi se shteti nuk do të mbyllë më sytë ndaj shkeljeve, duke nënvizuar se ligji do të zbatohet njësoj si për qytetarët e zakonshëm, ashtu edhe për kompanitë më të fuqishme.
“Sado i madh të jetë emri i ndërtuesit dhe sado i lartë pallati i ngritur pa leje, shteti është mbi gjithçka dhe nuk lejon më abuzime,” shtoi ai.
Me këtë mesazh, Rama kërkoi që Policia e Shtetit të shndërrohet nga një strukturë që dikur toleronte shkeljet, në një mekanizëm të fortë për mbrojtjen e ligjit dhe qytetarëve.
