Kryeministri Edi Rama ka bërë një thirrje për shqiptarët që jetojnë jashtë vendit, duke i ftuar ata të kthehen në atdhe dhe të investojnë në Shqipëri.
Në podkastin “Flasim”, ai theksoi se Shqipëria është tani një realitet krejt tjetër, një vend i gatshëm për t’i pritur emigrantët që duan të kontribuojnë me përvojën e tyre të fituar jashtë vendit.
Rama nënvizoi rëndësinë e kthimit të emigrantëve, duke theksuar se ata sjellin me vete dije dhe eksperiencë të vlefshme që mund të përdoren për të ndihmuar zhvillimin e vendit. Ai e cilësoi këtë si një “armë” për suksesin, duke e krahasuar kthimin e emigrantëve me mundësinë e krijimit të një industri të re dhe mundësi për zhvillim të qëndrueshëm.
“Çdo kthim është një dije ekstra, për shkak të eksperiencës së mbledhur në një realitet tjetër. Shqipëria sot nuk është më e vështirë se Greqia e dikurshme për ata që dikur punuan atje, edhe mes paragjykimeve. Sot, 35% e prodhimit në Kretë është në duart e shqiptarëve. Nëse këta njerëz punojnë tokën këtu, marrin tokë me qira apo bashkëpunojnë me të tjerët, me siguri do të kenë sukses,” u shpreh Rama, duke theksuar mundësitë për të kontribuar dhe investuar në vend.
Kryeministri po ashtu foli për të ardhmen e Shqipërisë në rrugën e saj drejt Bashkimit Evropian. Ai tha se vendi ka bërë përparim të madh dhe se së shpejti do të hapen kapituj të tjerë të negociatave për anëtarësimin në BE, me synimin që Shqipëria të bëhet anëtare brenda kësaj dekade.
“Shqipëria është në avancim. Së shpejti do të hapim kapitujt e tjerë të negociatave me BE dhe synojmë të anëtarësohemi brenda kësaj dekade. Të investosh sot në Shqipëri është një investim i mirë për të ardhmen,” tha Rama, duke i ftuar emigrantët të shohin mundësitë që ofron vendi për investime afatgjata.
Në fund, Rama u bëri një thirrje të drejtpërdrejtë shqiptarëve jashtë vendit, duke u theksuar se Shqipëria është gati për t’i pritur dhe se investimi në atdhe është një mundësi që nuk duhet humbur. “Kush nuk provon, nuk fiton. Shqipëria është sot e gatshme për të pritur shumë më tepër emigrantë mbrapsht. Ju keni një përvojë që është një armë e fortë për suksesin tuaj këtu,” përfundoi ai.
Ky mesazh i kryeministrit Rama është një apel i fortë për emigrantët që kanë kontribuar në zhvillimin e vendeve ku jetojnë, duke ofruar mundësi të reja për ata që duan të investojnë në Shqipëri dhe të kontribuojnë në rritjen ekonomike dhe zhvillimin e mëtejshëm të vendit.
