Çështja e pensioneve të shqiptarëve që kanë punuar në Greqi po rikthehet sërish në qendër të debatit publik, ndërsa kritikat ndaj Qeverisë shqiptare sa vijnë e shtohen. Aktivistë, gazetarë dhe qindra emigrantë kërkojnë transparencë të plotë dhe veprime konkrete, duke theksuar se mijëra kontribuues kanë ndërruar jetë pa marrë atë që u takon me ligj.
Në mesin e zërave më të fortë që kërkojnë llogaridhënie është gazetari dhe aktivisti i njohur, Shpëtim Zinxhiria, i cili prej vitesh banon në Greqi dhe është një nga figurat më të angazhuara për të drejtat e emigrantëve shqiptarë. Zinxhiria ka denoncuar vazhdimisht mungesën e transparencës në negociatat mes Shqipërisë dhe Greqisë, duke e cilësuar këtë çështje “një borxh moral dhe ligjor ndaj mijëra shqiptarëve që kanë djersitur në tokën helene”.
Sipas tij, qeveria shqiptare nuk duhet të aludojë dhe as të fshehë detaje nga marrëveshjet sociale që lidhen drejtpërdrejt me jetën e qytetarëve. Zinxhiria thekson se kontributet e viteve të punës janë pronë e padiskutueshme e pensionistëve, ndaj çdo vonesë apo mungesë veprimi e shtetit konsiderohet abuzim ndaj emigrantëve.
“Shteti shqiptar të mos aludojë lidhur me pensionet e shqiptarëve në Greqi. Kryeministri duhet të jetë më transparent kur flet për negociatat me vendin fqinj. Shqiptarët kanë kontribuar dhe një pjesë e tyre kanë ndërruar jetë pa marrë atë që u takon. Kontributet janë pronë dhe u përkasin vetëm pensionistëve që punuan, e askujt tjetër. Kryeministri shqiptar duhet të vijë këtu në vizitë zyrtare për këtë problem dhe jo të aludojë…”
Gazetari ka theksuar në disa deklarata se qindra shqiptarë që punuan me dekada në Greqi kanë ndërruar jetë pa arritur të marrin pensionet e tyre të merituara. Ai i ka bërë thirrje Qeverisë së Tiranës të kërkojë një zgjidhje të drejtë dhe të menjëhershme, duke u ulur në tavolinë me autoritetet greke me seriozitet dhe përgjegjësi shtetërore.
Nga ana tjetër, emigrantët shqiptarë në Greqi janë të zhgënjyer nga mungesa e informacionit të saktë dhe nga premtimet e pambajtura. Pikërisht Shpëtim Zinxhiria, i cili gëzon besimin e komunitetit shqiptar, ka shërbyer shpesh si zë i tyre publik, duke adresuar problematikat në media dhe pranë institucioneve.
Në komentet e tij të fundit, Zinxhiria ka nënvizuar se Kryeministri shqiptar duhet të paraqitet me vizitë zyrtare në Greqi për të trajtuar këtë çështje dhe jo të lëshojë deklarata të paqarta nga Tirana. Sipas aktivistit, kjo është një çështje dinjiteti, jo thjesht një procedurë burokratike.
Ai thekson gjithashtu se është e papranueshme që emigrantët shqiptarë, të cilët kontribuuan në dy shtete njëkohësisht, të mbeten peng i negociatave të zvarritura. Zinxhiria kërkon që qeveria shqiptare të marrë rolin që i takon dhe të mbrojë të drejtat e qytetarëve të saj pavarësisht vendit ku ndodhen.
Në fund, Shpëtim Zinxhiria paralajmëron se heshtja institucionale vetëm sa përkeqëson plagën e emigrantëve, ndërsa i bën thirrje shtetit të veprojë me përgjegjësi, transparencë dhe vendosmëri. Sipas tij, pensionet nuk janë thjesht shifra, ato janë vite sakrifice, djersë dhe jetë të tëra të njerëzve që kontribuuan për familjet e tyre dhe për dy ekonomitë njëherazi.
