Kryeministri i Bullgarisë Rosen Zhelyazhkov ka njoftuar dorëheqjen e tij të hënën, pas disa javësh protestash kundër politikave ekonomike dhe akuzave të qytetarëve për mungesë rezultatesh në luftën kundër korrupsionit. Vendimi erdhi pak minuta para se parlamenti të zhvillonte votimin për mocionin e mosbesimit ndaj qeverisë së tij.
Në një fjalim televiziv, Zhelyazhkov deklaroi se dorëheqja ishte “momenti i duhur”, duke shtuar se ai besonte se qeveria e tij do të kishte marrë mbështetjen e nevojshme në votimin parlamentar. Megjithatë, ai theksoi se vendi po hyn në një fazë të rëndësishme, ndërsa përgatitet të anëtarësohet në Eurozonë më një janar.
Kryeministri në largim theksoi arritjet e qeverisë së tij në ruajtjen e stabilitetit makroekonomik dhe rritjen e të ardhurave, duke shtuar se buxhetet për vitet pasuese parashikojnë rritje të mbështetjes sociale dhe forcim të qëndrueshmërisë fiskale.
Duke iu referuar protestave të ditëve të fundit, Zhelyazhkov tha se ato duhet të shërbejnë për të përcaktuar drejtimin që do të marrë vendi pas zgjedhjeve të vitit 2026.
Dorëheqja e tij hap rrugën për zhvillime të reja politike në Sofje, në një moment kyç për Bullgarinë, e cila është në prag të një prej hapave më të rëndësishëm të integrimit të saj evropian.
