Gjatë 72 orëve të fundit, qarku i Elbasanit është përballur me pasojat e motit të keq, duke shkaktuar bllokime rrugësh dhe ndërprerje të energjisë elektrike në disa zona.
Strukturat përgjegjëse po punojnë intensivisht për të rikthyer normalitetin në të gjitha akset rrugore dhe për të eliminuar dëmet e shkaktuara.
Sipas të dhënave nga Emergjencat Civile, rrugët nacionale dhe kryesore rurale janë aktualisht të hapura për qarkullim. Në zonat ku bora dhe ngricat kanë krijuar probleme, firmat kontraktuese kanë kryer pastrimin e rrugëve dhe hedhjen e kripës për të parandaluar aksidentet.
Në aksin Elbasan-Qafë Thanë, në segmentin problematik të “Kthesave të Qafë Thanës,” temperaturat kanë zbritur deri në -6°C. Prej mëngjesit të së mërkurës, borëpastrueset dhe ekipet e emergjencave kanë ndërhyrë për të siguruar qarkullimin e automjeteve.
Aksi Librazhd-Steblevë-Bulqizë mbetet sfidues, me qarkullimin e mundur vetëm me zinxhirë dhe goma dimërore në segmentin Borova-Steblevë. Në pjesët e tjera të këtij aksi, lëvizja kryhet normalisht. Në rrugët e tjera kombëtare të qarkut, ndërhyrjet kanë qenë të suksesshme, dhe kripë është hedhur në zonat më të rrezikuara.
Në bashkitë Elbasan, Librazhd, Prrenjas dhe Gramsh, vijon puna për hapjen e rrugëve që lidhin fshatrat malorë me njësitë administrative. Në Elbasan, përpjekjet po përqendrohen në aksin Elbasan-Labinot Mal dhe Elbasan-Funarë.
Sa i përket prurjeve të lumenjve dhe përrenjve malorë, situata paraqitet e qetë. Prurjet janë brenda kuotave normale, duke shmangur përmbytjet në zonat përreth.
Furnizimi me energji elektrike, edhe pse i përmirësuar, mbetet problematik në disa fshatra. Në njësitë administrative Polis (Librazhd), Bishqem (Peqin), dhe Funar (Elbasan), disa kabina elektrike kanë pësuar defekte të rënda. Probleme janë raportuar gjithashtu në qytetin e Prrenjasit dhe në Gramsh. Ekipet e OSHE po punojnë në terren për të riparuar dëmet dhe për të rikthyer energjinë në zonat e prekura.
Autoritetet apelojnë për bashkëpunimin e qytetarëve, veçanërisht në respektimin e këshillave për përdorimin e zinxhirëve dhe gomave dimërore në akset e vështira. Ndërkohë, strukturat përgjegjëse do të vijojnë ndërhyrjet për të garantuar sigurinë dhe furnizimin me shërbimet bazë në të gjithë qarkun.
