Edhe pse numri i të huajve në punë është rritur ndjeshëm, ata mbeten vetëm 2% e forcës së punës në sektorin privat në Shqipëri.
Sipas të dhënave të fundit nga INSTAT, në fund të vitit 2024 në Shqipëri ishin regjistruar 11.9 mijë shtetas të huaj me leje qëndrimi për punë. Ky numër është pothuajse dyfishuar krahasuar me vitin 2018, por mbetet tepër i ulët në raport me nevojat e tregut. Të huajt përbëjnë vetëm 2% të të punësuarve në sektorin privat, ku janë rreth 560 mijë punonjës gjithsej.
Mungesa e fuqisë punëtore vendase ka nisur të ndihet para pandemisë, si pasojë e emigracionit masiv të të rinjve dhe plakjes graduale të popullsisë. Bizneset shqiptare, për të zbutur këtë mungesë, kanë tentuar të sjellin punonjës nga vende të ndryshme, duke filluar me Bangladeshin. Por shumë prej tyre e shfrytëzuan Shqipërinë si pikë kalimi drejt vendeve të BE-së dhe rezultuan me mungesë kualifikimi.
Në vitet pasuese, u provua me punonjëse nga Nepali, kryesisht në industrinë fason, dhe me indianë për bujqësinë. Rritja e turizmit e shtoi urgjencën për punonjës në sektorin e shërbimit, duke sjellë punësime të reja nga Afrika. Për vitin 2023, sektori i akomodimit dhe shërbimit ushqimor përbënte 20% të lejeve të punës, ndërtimi 12% dhe tregtia 10%.
Shumë punonjës të huaj përdorin Shqipërinë si trampolinë për të kaluar në Greqi, ku pagat sezonale për kamerierë dhe banakierë arrijnë deri në 4 mijë euro. Ai thekson edhe problemin e mungesës së kualifikimit profesional, pasi shumica vijnë nga punë ndihmëse dhe nuk janë të përgatitur për standardet shqiptare të shërbimit.
Megjithatë, filipinasit shihen si punonjësit më të qëndrueshëm dhe korrektë, duke respektuar kontratat dhe duke ofruar profesionalizëm falë përvojës së tyre në turizëm. Ata janë bërë një prani e rregullt në bare dhe restorante, sidomos në kryeqytet.
