Report TV ka publikuar pamjet tronditëse të momentit kur biznesmeni Eduart Reçi, 52 vjeç, qëllohet me armë dhe rrëzohet në tokë pranë pallatit ku jetonte. Ngjarja e rëndë ndodhi më 13 nëntor, në sheshpushimin e ndërtesës së tij, përballë Fakultetit Ekonomik, në rrugën e Elbasanit, Tiranë.
Kliko këtu për të parë videon
Në video, biznesmeni duket duke qëndruar pranë pallatit, kur autori i afrohet dhe e qëllon me armë, duke e lënë të shtrirë në vend. Skena e ekzekutimit ka ngjallur tronditje te banorët e zonës dhe opinionin publik.
Pas hetimeve të shpejta, Policia e Tiranës ka arrestuar dy vëllezërit, Shkëlqim dhe Florian Dukaj, të dyshuar si të përfshirë në këtë krim. Gjykata e Tiranës vendosi sot masën e sigurisë “arrest me burg” për të dy, ndërsa hetimet po vijojnë për të zbardhur rrethanat dhe motivet e ngjarjes.
Eduart Reçi ishte një ndërtues i njohur dhe sipas burimeve, konflikte të mundshme të natyrës personale apo profesionale janë pista kryesore të hetimit. Autoritetet po shqyrtojnë lidhjet e viktimës dhe të dyshuarve për të përcaktuar motivet që çuan në këtë akt të rëndë kriminal.
Kjo vrasje e bujshme rikthen vëmendjen mbi sigurinë publike dhe problematikat e pazgjidhura në lidhje me veprimet kriminale në zonat urbane. Ndërkohë, autoritetet kanë premtuar hetime të thelluara për të vënë para drejtësisë personat përgjegjës.
