Biseda të reja të siguruara nga aplikacioni Sky ECC tregojnë se ish efektivi i Operacionales, Igli Haxhiaj, i arrestuar me urdhër të SPAK, dyshohet të ketë kërkuar para në këmbim të informacionit të klasifikuar.
Sipas komunikimeve të zbuluara, Haxhiaj ka biseduar me Denis Myftiun, i cili është shpallur në kërkim, për marrëveshje që përfshinin dhënien e informacioneve hetimore. Nga bisedat del se Haxhiaj i ka kërkuar Myftiun shumën prej 15 mijë eurosh, pesë mijë euro për secilin prej tre personave të përfshirë.
Në një prej komunikimeve, Haxhiaj e paralajmëron Myftiun se si ai, ashtu edhe familjarët e tij ndodhen nën përgjim dhe i kërkon të tregojë kujdes gjatë bisedave në telefon.
SPAK dyshon gjithashtu se Haxhiaj mund të jetë i përfshirë edhe në trafikimin e lëndëve narkotike, pasi elemente të tilla reflektohen në komunikimet e aplikacionit të koduar, megjithatë deri në këtë fazë nuk ka prova të plota që e lidhin drejtpërdrejt me këtë veprimtari.
Ndërkohë, Denis Myftiu vijon të jetë në kërkim, pasi dyshohet se ka pasur rol kryesor në organizimin e trafikut të kokainës dhe heroinës nga Shqipëria drejt Italisë.
