Naftëtarët e Marinzës mbyllin grevën e urisë pas përkeqësimit të gjendjes shëndetësore, por paralajmërojnë protesta të tjera deri në arritjen e kërkesave të tyre.
Pas 17 ditësh grevë urie, punonjësit e shoqërisë “Bankers Petroleum” në Marinzë të Fierit vendosën të ndërpresin këtë formë ekstreme proteste, por njoftuan se do të vazhdojnë me tubime të rregullta publike. Greva u ndërpre për shkak të përkeqësimit të gjendjes shëndetësore të shtatë prej grevistëve, ndërsa pjesa tjetër e punonjësve vijon bojkotin e punës.
Vendimi u mor në një mbledhje të zhvilluar mbrëmjen e së premtes, ku sindikata dhe punonjësit vlerësuan rrezikun në rritje për shëndetin e grevistëve dhe mungesën e reagimit nga kompania. Sipas tyre, ndërprerja e grevës së urisë nuk nënkupton dorëzim, por është një hap për ruajtjen e jetës së punëtorëve.
Në një njoftim publik, Sindikata e Sektorit Hidrokarbur theksoi se gjatë këtyre ditëve naftëtarët janë përballur me presione për t’u rikthyer në punë, pasiguri profesionale dhe kontrata të pasakta, si nga kompania kryesore ashtu edhe nga nënkontraktorët. Ata pretendojnë se kompania ka ndërtuar skema shfrytëzuese me paga të ulëta dhe kontrata të përkohshme që mbajnë punonjësit nën presion të vazhdueshëm.
Sindikata akuzoi më tej kompaninë për heshtje, papërgjegjshmëri dhe intimidim gjatë gjithë periudhës së grevës, duke shtuar se punonjësit janë lënë “në shesh” për ditë të tëra pa marrë asnjë përgjigje konkrete.
Megjithëse greva e urisë mbyllet, greva e përgjithshme e punonjësve mbetet aktive. Tubimi i radhës është planifikuar të zhvillohet të mërkurën, më 05.11.2025, në orën 12:15, përpara zyrave të “Bankers Petroleum” në Fier. Sindikata tha se protesta të tjera do të vijojnë sipas kalendarit që do të përcaktohet në ditët në vijim.
Ndërkohë, sindikata bëri të ditur se përfaqësuesit e punonjësve kanë zhvilluar dje një takim me Ministren e Ekonomisë, Delina Ibrahimaj. Gjatë takimit u paraqitën të gjitha kërkesat dhe shqetësimet e punëtorëve, si dhe u kërkua ndërhyrje urgjente për gjetjen e një zgjidhjeje.
Sipas deklarimeve të sindikatës, ministrja u shpreh se çështja do të trajtohet me prioritet dhe se Ministria do të ndërmjetësojë në negociata mes palëve për një marrëveshje të drejtë.
Naftëtarët kërkojnë rritje fondi pagash me 18%, shpërndarje të barabartë të rritjes për punonjësit me paga më të ulëta, zbatimin e ligjit për statusin e naftëtarit, promovim sipas meritës, shpërndarje të drejtë të bonuseve dhe rritjen e trajtimit ushqimor nga 9000 lekë në 13200 lekë në muaj.
Pavarësisht ndërprerjes së grevës së urisë, sindikata thekson se protesta do të vazhdojë derisa kërkesat të merren seriozisht dhe të zbatohen konkretisht.
