Një projektligj i ri parashikon riorganizimin e policive bashkiake në të gjithë vendin dhe krijimin e një strukture të re qendrore në varësi të Ministrisë së Brendshme.

Sipas draftit të projektligjit, kompetencat e policive bashkiake do të përqendrohen në një Drejtori të Përgjithshme të Policisë Bashkiake, e cila do të drejtohet nga një drejtor i emëruar me të njëjtën formulë si drejtori i Policisë së Shtetit. Mandati i drejtuesit parashikohet të jetë pesëvjeçar.

Projektligji përcakton se Drejtoria e Përgjithshme e Policisë Bashkiake do të ketë në varësi të saj 61 polici bashkiake në nivel vendor, duke i vendosur këto struktura nën mbikëqyrjen e drejtpërdrejtë të ministrit të Brendshëm.

Drafti i projektligjit është hartuar pas ndryshimeve të mëparshme ligjore që i hoqën bashkive kompetencat për dhënien e lejeve të ndërtimit, të cilat tashmë kalojnë përmes Agjencisë së Zhvillimit të Territorit. Sipas njoftimeve zyrtare të Ministrisë së Brendshme, projektligji ishte parashikuar të hidhej për konsultim publik në periudhën 18 dhjetor–15 janar.

Nisma ligjore synon një ristrukturim të funksionimit të policive bashkiake dhe ndryshim të mënyrës së administrimit të tyre në rang kombëtar.