Programi i bursave të Fondit Shqiptaro-Amerikan për Zhvillim synon të forcojë arsimin e lartë shqiptar dhe të ofrojë mundësi reale për studentët, duke lidhur institucionet vendase me ato ndërkombëtare dhe duke nxitur ekselencën akademike.
Fondi Shqiptaro-Amerikan për Zhvillim ka prezantuar programin e ri të bursave, një nismë thelbësore që synon të sjellë përparim të prekshëm në sistemin arsimor shqiptar. Ky program krijon një platformë të re për studentët shqiptarë, duke i mbështetur ata që kërkojnë arsim cilësor, si në Shqipëri ashtu edhe në universitetet më të njohura ndërkombëtare.
Programi ndërtohet mbi dy shtylla kryesore: nga njëra anë, mbështetjen për studentët bachelor që ndjekin programe të përbashkëta apo diploma të dyfishta në universitetet shqiptare, dhe nga ana tjetër, krijon mundësi për studentët që synojnë të ndjekin master në universitetet elitare të Shteteve të Bashkuara të Amerikës.
Në ceremoninë e prezantimit morën pjesë emra të rëndësishëm të arsimit dhe diplomacisë, përfshirë Ministren e Arsimit dhe Sportit Ogerta Manastirliu, të ngarkuarën me punë të Ambasadës Amerikane në Tiranë, Nancy VanHorn, si dhe drejtues të lartë të Fondit Shqiptaro-Amerikan për Zhvillim. Të pranishëm ishin edhe drejtues të institucioneve arsimore, studentë dhe pedagogë, duke nënvizuar rëndësinë e kësaj nisme për të ardhmen e arsimit të lartë në Shqipëri.
Ministrja Manastirliu theksoi se ky program është plotësisht në linjë me vizionin strategjik të qeverisë për ndërkombëtarizimin e arsimit të lartë. Sipas saj, mbështetja për studentët që ndjekin programe të dyfishta apo ndërkombëtare është thelbësore për zhvillimin e një brezi të ri liderësh dhe inovatorësh shqiptarë. Ajo vuri në dukje se mundësitë e reja të krijuara nga ky program do të fuqizojnë konkurrueshmërinë dhe përgatitjen profesionale të të rinjve shqiptarë.
Partnerët e parë që janë përfshirë në këtë program janë Instituti i Teknologjisë Rochester (RIT) Albania, Kolegji i Europës në Tiranë dhe Shkolla Holberton Albania. Sipas Manastirliut, këto institucione sjellin standarde të larta akademike dhe një qasje ndërkombëtare në mësimdhënie, duke i dhënë studentëve shqiptarë mundësinë të përgatiten për tregun global të punës.
Michael Granoff, drejtues i Bordit të Fondacionit Shqiptaro-Amerikan për Zhvillim, u shpreh optimist për ndikimin afatgjatë të këtij programi dhe theksoi se me kalimin e viteve do të përfshihen edhe më shumë partnerë, duke rritur rrjetin e bashkëpunimit për të ardhmen e arsimit në Shqipëri.
Në fjalën e saj përmbyllëse, Ministrja Manastirliu deklaroi se ndërkombëtarizimi i universiteteve është prioritet kombëtar, dhe se qeveria është e angazhuar për të hapur rrugë të reja bashkëpunimi me universitetet më të mira europiane dhe botërore. Ajo përmendi edhe hapa konkretë si hapja e kampusit të Kolegjit të Europës në Tiranë, fillimi i Universitetit Kombëtar të Arsimit në Distancë të Spanjës në Gjirokastër, si dhe planet për një kampus të ri të Universitetit të Teknologjisë së Compiègne dhe Universitetit Politeknik të Tiranës.
Sipas Ministres, këto nisma janë pjesë e një vizioni të qartë për të ngritur nivelin e arsimit, për të nxitur inovacionin dhe për t’i ofruar studentëve shqiptarë akses në arsim të cilësisë më të lartë, pa qenë të detyruar të largohen nga vendi. Sipas saj, ekselenca në arsim është e domosdoshme për të ardhmen e rinisë shqiptare, për ekonominë e vendit dhe për integrimin në Bashkimin Evropian.
Në përfundim, Ministrja falenderoi Fondin Shqiptaro-Amerikan për Zhvillim për mbështetjen e vazhdueshme dhe u shpreh e bindur se Shqipëria do të kthehet në një pol të rëndësishëm të arsimit të lartë dhe kërkimit shkencor në rajon.
