Një 41 vjeçar me shtetësi turke është proceduar penalisht në pikën kufitare të Qafë Thanës pasi dyshohet se ka ndihmuar kalimin e paligjshëm të kufirit të një shtetaseje të huaj. Gjatë kontrollit me skaner të kamionit që ai drejtonte, policia kufitare zbuloi një grua të fshehur në rimorkio.
Sipas autoriteteve, ndaj shtetasit S A është ngritur procedim për veprën penale ndihma për kalim të paligjshëm të kufijve. Ngjarja është regjistruar në momentin e hyrjes në territorin e Shqipërisë, kur sistemet e skanimit sinjalizuan praninë e një personi të padeklaruar.
Materialet e mbledhura janë dërguar në Prokurorinë e Korçës për vijimin e hetimeve dhe nisjen e procedurave të mëtejshme ligjore.
