Olivier Letan shpërthen ndaj Marsejës, duke e akuzuar për kontakte të paligjshme me Edon Zhegrovën, pa leje nga klubi i tij aktual Lille.
Merkatoja e verës është ndezur nga lajmi se Edon Zhegrova po i afrohet zyrtarizimit te skuadra franceze e Marsejës. Lëvizja e mundshme ka bërë që në Francë të shpërthejnë polemikat, me presidentin e Lille, Olivier Letan, që reagoi publikisht.
Letan akuzoi hapur Marsejën për shkelje të rregullave, duke pretenduar se klubi rival ka zhvilluar kontakte direkte me lojtarin pa kërkuar leje nga Lille. Ai theksoi se një veprim i tillë bie ndesh me normat e vendosura në futbollin profesionist.
“Jam i habitur që mund të ketë një marrëveshje mes Zhegrovës dhe Marsejës, ndërkohë që ne nuk kemi asnjë kontakt me ta. Rregullat janë të qarta: ndalohet të afrosh një lojtar pa leje nga klubi ku ai luan,” deklaroi Letan.
Presidenti i Lille shtoi se nuk ka marrë asnjë kërkesë zyrtare nga Marseja për të zhvilluar bisedime me sulmuesin kosovar. Ai u shpreh i indinjuar nga fakti që kishte dëgjuar se trajneri i Marsejës kishte folur personalisht me lojtarin.
“Ka rregulla në jetë dhe në sjellje që duhet të respektohen. Sot në mëngjes kam dëgjuar se trajneri i tyre ka folur me lojtarin tim. Është befasuese, por nuk është hera e parë që ndodh me Marsejën,” shtoi ai.
Ky episod pritet të shtojë tensionin mes dy klubeve franceze, ndërkohë që e ardhmja e Zhegrovës mbetet e paqartë dhe mund të ndikojë në vijimin e negociatave.
