Presidenti i Republikës, Bajram Begaj, ka marrë këto ditë telegrame dhe letra urimi nga udhëheqës të vendeve rajonale, evropiane dhe botërore me rastin e 28 Nëntorit, Ditës së Flamurit dhe të Pavarësisë së Shqipërisë.
Ndër urimet e shumta, Presidenti i Shteteve të Bashkuara, Donald Trump, ka dërguar një telegram të posaçëm për Presidentin Begaj. Në mesazhin e tij, Trump përcjell urimet për popullin shqiptar dhe thekson gatishmërinë e SHBA për forcimin e mëtejshëm të bashkëpunimit dypalësh.
“Në emër të popullit të Shteteve të Bashkuara, ju dërgoj urimet tona më të mira juve dhe popullit të Shqipërisë ndërsa festoni pavarësinë tuaj. Shtetet e Bashkuara dhe Shqipëria gëzojnë një partneritet të fortë të krijuar nga lidhje të ngushta sigurie, ekonomike dhe njerëzore. Pres me padurim forcimin e bashkëpunimit tonë mbi prioritetet e përbashkëta, duke përfshirë stabilitetin rajonal, përballjen me organizatat kriminale ndërkombëtare dhe zgjerimin e mundësive të biznesit dhe tregtisë. Ju uroj juve dhe popullit të Shqipërisë një Ditë të gëzuar Pavarësie,” shkruan Presidenti Trump.
Presidenti Bajram Begaj ka shprehur mirënjohjen për këtë urim, duke theksuar se ndihet i nderuar t u përcjellë shqiptarëve mesazhin e Presidentit amerikan. Ai ka theksuar angazhimin e Shqipërisë për të vijuar punën me Shtetet e Bashkuara në fushat me interes të përbashkët.
“Shqipëria mbetet e përkushtuar për të punuar me Shtetet e Bashkuara mbi prioritetet tona të përbashkëta. Shqipëria gjithmonë ka qëndruar dhe do të qëndrojë përkrah Shteteve të Bashkuara. Zoti i bekoftë kombet dhe popujt tanë,” shprehet në mesazhin e tij Presidenti Begaj.
