Prej gati një muaji, mbetjet urbane të pambledhura në fshatin Baltëz të bashkisë Fier janë kthyer në një problem serioz për banorët dhe mjedisin.
Temperaturat e larta të këtyre ditëve kanë rënduar edhe më shumë situatën, ndërsa mbeturinat, që shtohen çdo ditë, po krijojnë një situatë të rëndë higjieno-sanitare dhe rrezik për shëndetin e komunitetit.
Kryetari i fshatit Baltëz, Latif Kazanxhiu, thotë se për situatën është njoftuar edhe administratori i Njësisë Administrative Dermenas, por deri tani nuk është ndërmarrë asnjë masë konkrete për pastrimin e mbetjeve.
Sipas tij, dekompozimi i mbeturinave ka shkaktuar erë të rëndë dhe të padurueshme, ndërsa zona përreth është kthyer në një mjedis të papërshtatshëm për banorët.
Kazanxhiu i shpreh se indiferenca e pushtetit vendor po e përkeqëson situatën, pasi mbetjet vazhdojnë të grumbullohen çdo ditë.
Në kushtet kur, sipas tij, kërkesat e banorëve nuk kanë marrë zgjidhje, kryetari i fshatit paralajmëron edhe protestë.
Ai kërkon ndërhyrje të menjëhershme të bashkisë për largimin e mbetjeve dhe normalizimin e situatës, duke paralajmëruar se nëse pastrimi nuk kryhet së shpejti, banorët do të ngrihen në protestë.