Ushtria polake njoftoi rrëzimin e dronëve rusë që depërtuan në territorin e saj, ndërsa Rusia vijoi sulmet e rënda ajrore mbi Ukrainë.
Ushtria e Polonisë konfirmoi se gjatë natës ka neutralizuar disa dronë që shkelën hapësirën ajrore të vendit, në kulmin e një vale të re sulmesh ajrore ruse mbi Ukrainën. Kryeministri Donald Tusk deklaroi se ishte informuar nga Komanda Operative e Ushtrisë për ndërhyrjen dhe kishte njoftuar Sekretarin e Përgjithshëm të NATO-s mbi situatën.
Forcat e armatosura polake ishin në gatishmëri të lartë nga e marta në mbrëmje deri të mërkurën në mëngjes, për shkak të një serie sulmesh masive ajrore ruse ndaj objektivave në Ukrainë. Ministri i Mbrojtjes, Władysław Kosiniak-Kamysz, tha se mbi dhjetë objekte fluturuese hynë në hapësirën ajrore polake, dhe ato që përbënin rrezik për sigurinë kombëtare u shkatërruan.
Aeroporti “Chopin” i Varshavës pezulloi fluturimet për disa orë, pasi hapësira ajrore u mbyll për shkak të operacioneve ushtarake. Kjo nuk është hera e parë që Polonia raporton shkelje nga objekte ruse; raste të ngjashme janë regjistruar edhe në gusht, mars dhe në vitin 2022, ku një raketë e supozuar ukrainase vrau dy persona në territorin polak.
Ndërkohë, sulmet ruse kanë goditur rëndë rajonet qendrore dhe perëndimore të Ukrainës. Në Khmelnytskyi, tre persona u plagosën dhe një fabrikë qepjeje u shkatërrua, ndërsa dëmtime u regjistruan në një pikë karburanti, automjete dhe banesa. Në Zhytomyr, një person humbi jetën dhe një tjetër u plagos, me dëme të konsiderueshme në ndërtesa dhe biznese.
Rajoni i Vinnytsia raportoi dëmtime në infrastrukturë civile dhe industriale, përfshirë 30 banesa, ku një person u plagos. Në Cherkasy, disa shtëpi dhe rrjeti elektrik u goditën, ndërsa në Zolotonosha një shpërthim vrau dy krerë bagëti.
Përveç sulmeve, tensionet janë rritur edhe për shkak të stërvitjeve të përbashkëta ushtarake Rusi-Bjellorusi, të quajtura “Zapad 2025”, që nisin të premten dhe zgjasin deri më 16 shtator. Këto manovra, që përfshijnë skenarë të mbrojtjes nga sulme ajrore dhe sabotime, po shqetësojnë Kievin dhe aleatët perëndimorë të rajonit, mes tyre edhe Poloninë.
