Arrestime, procedime penale dhe sekuestrim armësh shënuan veprimtarinë e fundit të Policisë së Fierit në luftën kundër shkeljeve dhe krimeve.
Në Fier, specialistët e Sektorit të Qarkullimit Rrugor arrestuan në flagrancë E. H., 27 vjeç nga Cakrani, dhe E. S., 35 vjeç nga Lushnja, pasi u kapën duke drejtuar automjetet në gjendje të dehur. Po ashtu, u arrestua A. K., 24 vjeç nga Dushku, i cili një ditë më parë përplasi me automjet një të mitur. Viktima ndodhet aktualisht nën kujdesin e mjekëve.
Ndërkohë, specialistët për Hetimin e Krimeve të Komisariatit të Fierit proceduan penalisht në gjendje të lirë M. F., 48 vjeçe nga Portëza, e dyshuar për ushtrim dhune ndaj vëllait të bashkëshortit, pas një konflikti për motive të dobëta.
Në Divjakë, policia nisi procedim penal për D. M., 48 vjeç, dhe një 17-vjeçar, pasi kanë kanosur një 24-vjeçar. Gjatë kontrollit, te i mituri u gjet një armë sportive tip pistoletë, e cila u sekuestrua si provë materiale.
Një tjetër incident u regjistrua në Lushnjë, ku dyshohet se mbingarkesa elektrike në kabinën e një pallati në lagjen “Çlirimi” shkaktoi zjarr në katin zero. Zjarri solli dëme të vogla materiale, ndërsa dy banorë u asfiksuan nga tymi. Ata morën ndihmë mjekësore në spital dhe u kthyen në banesat e tyre.
Policia theksoi se materialet procedurale për të gjitha rastet i janë dorëzuar Prokurorisë së Fierit për veprime të mëtejshme. Kontrolli dhe monitorimi i situatës do të vijojë në gjithë qarkun për të parandaluar shkeljet dhe incidentet e ngjashme.
