Turizmi bregdetar në Fier po shënon rritje të fortë këtë verë, duke tërhequr vizitorë vendas e të huaj të joshur nga natyra dhe gastronomia lokale.
Këtë sezon, plazhet e Fierit kanë qenë më të frekuentuara se kurrë, jo vetëm nga pushuesit vendas, por edhe nga grupe të shumta turistësh të huaj, të sjellë kryesisht nga operatorët lokalë të turizmit.
Në muajin gusht, gjermanët dhe anglezët kanë qenë vizitorët më të pranishëm në vijën bregdetare të Adriatikut, të magjepsur nga rëra me veti kurative, uji i pastër dhe mjediset natyrore të paprekura.
Përveç peizazheve, ushqimi tradicional ka luajtur një rol kyç në tërheqjen e turistëve. Sipërfaqet e gjera me rërë dhe shërbimet e përmirësuara kanë bërë që zona të konkurrojë denjësisht me destinacionet fqinje, pavarësisht se çmimet mbeten pothuajse të njëjta.
Matilda Voja, operatore turistike në Fier, thotë se promocioni është fokusuar te gastronomia, parqet arkeologjike dhe plazhet. “Këto elemente i kemi vënë në plan të parë dhe kanë pasur shumë pëlqim, sidomos nga turistët gjermanë. Edhe grupet nga Anglia kanë mbetur të kënaqur nga bregdeti dhe kuzhina jonë,” thekson ajo.
Megjithatë, sipas saj, qyteti ende nuk ka kapacitete të mëdha hoteliere, ndonëse ndodhet vetëm pak kilometra larg bregdetit. Planet e zhvillimit parashikojnë që kjo të ndryshojë në vitet e ardhshme.
Aktualisht, akomodimi i grupeve të huaja bëhet kryesisht në bujtina dhe shtëpi komode në fshatrat pranë detit. Kjo ka krijuar një përvojë autentike për vizitorët, të cilët shpesh e vlerësojnë mikpritjen lokale.
Operatorët turistikë besojnë se investimet në infrastrukturë dhe rritja e kapaciteteve të akomodimit do të rrisin edhe më shumë potencialin turistik të Fierit, duke e shndërruar atë në një destinacion të rëndësishëm të rivierës shqiptare.
