Një 28-vjeçar u plagos me armë në Hamallaj pas një sherri për parkim; policia arrestoi dy persona, shpalli dy të tjerë në kërkim.
Policia e Durrësit sqaroi se ngjarja ndodhi më 20.08.2025, rreth orës 17:00, në zonën bregdetare të Hamallajt, Njësia Sukth. Sherri nisi për parkimin e një automjeti pranë hapësirës së plazhit të A. L., 37 vjeç.
Sipas hetimeve paraprake, debati filloi me përdorim sendesh të forta dhe më pas A. L., 37 vjeç, qëlloi me armë zjarri që e mbante pa leje, ndaj L. R., 28 vjeç, banues në Kolesjan, Kukës.
I plagosuri u dërgua në Spitalin e Traumës në Tiranë. Mjekët konfirmuan se ai është jashtë rrezikut për jetën.
Në flagrancë u arrestuan: Alfons Lekgegaj, 37 vjeç, banues në Hamallë, Durrës, i dyshuar për “vrasje me dashje, mbetur në tentativë, kryer në bashkëpunim” dhe “mbajtje pa leje e armëve dhe municioneve”; si dhe Armen Sabliqi, 18 vjeç, banues në Borakë, Shijak, i dyshuar për “mbajtje pa leje të armëve të ftohta”.
Policia shpalli në kërkim Altin Lekgegajn, 44 vjeç, dhe Serxho Lekgegajn, 21 vjeç, banues në Hamallë, Durrës. Të dy dyshohen për “vrasje me dashje, mbetur në tentativë, kryer në bashkëpunim” dhe “mbajtje pa leje të armëve dhe municioneve”.
Gjatë këqyrjes së vendit të ngjarjes u gjetën bishta druri të përdorur në konflikt. Në lokalin e arrestuarit A. S. policia gjeti dhe sekuestroi dy thika.
U sekuestruan edhe prova të tjera shkencore që do të shërbejnë për dokumentimin e plotë ligjor të autorësisë. Veprimet u kryen nga Sektori për Hetimin e Krimeve të Rënda, pranë Drejtorisë Vendore të Policisë Durrës.
Hetimet vijojnë për kapjen e të shpallurve në kërkim dhe sqarimin e çdo rrethane. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës.
