Ministria e Bujqësisë dhe Zhvillimit Rural ka reaguar ndaj polemikave të fundit mbi praninë e pesticideve në mandarinat shqiptare, duke theksuar angazhimin për sigurinë ushqimore dhe mbrojtjen e konsumatorëve.
Në një deklaratë publike, institucioni njoftoi masa të rrepta për shkelësit, përfshirë gjoba, bllokim aktivitetesh dhe kallëzime penale.
Sipas Ministrisë, për vitin 2024, mbi 85% e prodhimit të mandarinave është tregtuar në tregjet vendase dhe ndërkombëtare, ndërsa analizat zyrtare nuk kanë zbuluar mbetje të pesticideve në shumicën e rasteve. Nga 924 ngarkesa të eksportuara, vetëm tre janë konstatuar me parregullsi, dy prej të cilave janë asgjësuar në destinacion, ndërsa një ngarkesë është kthyer në Shqipëri dhe asgjësuar sipas rregullave ligjore.
Në bashkëpunim me institucione të tjera, janë kryer inspektime në zonat prodhuese si Konispoli dhe Dimal. Veprimet përfshijnë gjurmimin e produkteve të dyshimta dhe marrjen e masave administrative ndaj grumbulluesve që kanë shkelur rregullat. Në një rast konkret, mbi 20 ton mandarina janë asgjësuar në Fier.
Sistemi i Njoftimit të Shpejtë për Ushqim (RASFF) ka raportuar dy ngarkesa të tjera me pesticide nga Kroacia. Ministria deklaroi se njëra është asgjësuar në Kroaci, ndërsa tjetra pritet të kthehet për asgjësim në Shqipëri. Inspektimet përfshijnë edhe tregjet e brendshme, ku analizat e kryera kanë treguar se produktet janë në përputhje me standardet, me vetëm raste të izoluara problematike.
Autoriteti Kombëtar i Ushqimit (AKU) ka zhvilluar mbi 800 inspektime për tregtimin e pesticideve dhe produkteve plehëruese. Nga analizat e realizuara për vitin 2024, vetëm një mostër e pesticideve dhe dy të plehëruesve kanë rezultuar jo konforme, për të cilat janë marrë masa të menjëhershme.
Ministria ka në zbatim një plan veprimi për përdorimin e qëndrueshëm të pesticideve, duke përfshirë trajnime për fermerët dhe përdorimin e metodave të sigurtë në prodhim. Ajo thekson se Shqipëria ka arritur të shmangë shpërthimet e sëmundjeve që kanë prekur vendet fqinje, duke mbajtur një kontroll rigoroz mbi përdorimin e kimikateve bujqësore.
Përmes një qasjeje të kombinuar me edukimin dhe monitorimin, Ministria kërkon që fermerët të ndalojnë përdorimin e produkteve të ndaluara dhe të ndjekin praktikat më të mira bujqësore. Për këtë qëllim, ajo ka publikuar lista të përditësuara të produkteve të lejuara dhe fton qytetarët të raportojnë çdo rast shkeljeje.
Përmes këtij angazhimi, Ministria synon të mbështesë prodhuesit shqiptarë, të garantojë sigurinë ushqimore dhe të ruajë besimin e konsumatorëve në produktet vendase, duke theksuar se bashkëpunimi i të gjitha palëve është çelësi për një zinxhir prodhimi të qëndrueshëm dhe të sigurt.
