“Personazhe në Fokus” i jep jetë artit dhe muzikës qytetare vlonjate!

Kjo e shtunë sjell në emisionin “Personazhe në Fokus” çiftin artistik nga Vlorë, Sili Musaraj dhe Entela Ramadani, të cilët do të rrëfejnë historinë e tyre mes muzikës, jetës dhe dashurisë.

Ana Vlorës, emri artistik i Entela Ramadanit, prej 14 vitesh merret me muzikë, ndërsa Sili Musaraj prej më shumë se 6 vitesh është pjesë aktive e tregut muzikor. Të dy artistët tregojnë se lidhja e tyre me muzikën ka nisur që në fëmijëri, duke u rritur mes këngës qytetare dhe traditës shqiptare.

Përveç interpretimit në këngë, Sili është edhe instrumentist, duke luajtur në kitarë dhe piano, ndërsa muzika është bërë ura që bashkoi dy zemrat e tyre edhe në jetën bashkëshortore.

Të njohur për interpretimet e këngës qytetare vlonjate dhe isos polifonike, çifti është pjesë e gëzimeve familjare dhe aktiviteteve artistike lokale, duke sjellë repertorë të pasur me motive të jugut dhe këngë tradicionale shqiptare.

Në një rrëfim pa filtra përballë gazetarit Ndriçim Gjoshi, ata do të ndajnë me publikun historinë e jetës së tyre të përditshme, sfidat, sakrificat dhe dashurinë që i bashkoi përmes artit.

Emisioni sjell emocione reale, kujtime dhe histori njerëzore, duke qëndruar besnik filozofisë së tij “bardhë e zi”, larg fasadës dhe pranë realitetit të jetës.

Ky episod do të transmetohet këtë të shtunë në orën 21:00 në TV Apollon.

Mos e humbisni këtë bisedë të veçantë, ku muzika dhe jeta bashkojnë dy zemra në rrugëtimin e tyre artistik dhe njerëzor.