Armëpushimi mes Hamasit dhe Izraelit ka marrë fund, ndërsa Izraeli ka nisur sulmet ajrore në Gaza që në orët e para të së martës. Ky është një nga momentet më të rënda që nga fillimi i armëpushimit më 19 janar, duke sjellë valën më të madhe të sulmeve ajrore mbi këtë rajon. Ministria e Shëndetësisë në Gaza njoftoi se deri tani janë regjistruar 220 viktima, shumica e të cilëve janë civilë, përfshirë shumë fëmijë.
Një nga personat e vrarë gjatë këtyre sulmeve ishte Mahmoud Abu Wafah, zyrtari më i lartë i sigurisë së Hamasit në Gaza. Sulmet ajrore, që përfshinë disa objekte strategjike, janë drejtuar nga Forcat e Mbrojtjes të Izraelit (IDF), të cilët kanë deklaruar se ata shënjestruan “objektiva terroriste” të lidhura me Hamasin.
Përmes një deklarate të lëshuar nga zyra e kryeministrit izraelit, Benjamin Netanyahu, dhe ministrit të Mbrojtjes, Israel Katz, u bë e ditur se këto sulme ishin urdhëruar në përgjigje të refuzimit të vazhdueshëm nga ana e Hamasit për të liruar pengjet izraelitë dhe për të pranuar propozimet e ndërmjetësve ndërkombëtarë, përfshirë dërguarin presidencial të SHBA, Steve WItkoff.
Ky sulm i ri është pjesë e një plani më të gjerë ushtarak të prezantuar nga IDF gjatë fundjavës dhe miratuar nga udhëheqja politike izraelite. Kryeministri Netanyahu theksoi se Izraeli tani do të veprojë me forcë të shtuar kundër Hamasit, duke përmendur se do të përdoret fuqia ushtarake për të përballuar çdo kërcënim të mundshëm.
Ambasadori i Izraelit në Kombet e Bashkuara, Danny Danon, u shpreh se Izraeli do të vazhdojë të sulmojë Hamasin dhe paralajmëroi grupin që të lirojë të gjithë pengjet e mbajtur në Gaza. Ai tha se nuk do të ketë mëshirë për armiqtë dhe se Izraeli është i gatshëm të marrë masa drastike në këtë drejtim.
Nga ana e tij, Hamasi ka akuzuar Izraelin për tradhti, duke thënë se ky është një shkelje e marrëveshjes së armëpushimit. Grupi gjithashtu ka shprehur shqetësimin se pengjet izraelite të mbajtura në Gaza janë tani nën një “fati të panjohur” për shkak të sulmeve të rinisura. Megjithatë, Hamasi ende nuk ka shpallur një rikthim të plotë të luftës dhe ka apeluar për ndërhyrjen e ndërmjetësve dhe Kombeve të Bashkuara për të zgjidhur krizën.
Një zyrtar izraelit tha se Shtëpia e Bardhë ishte e njoftuar përpara nisjes së sulmeve, një njoftim që thekson angazhimin e Izraelit për të vepruar pa vonesa pas dështimit të armëpushimit.
Sulmet që kanë nisur tani janë një reflektim i vazhdimësisë të tensioneve dhe pasigurisë që ka mbizotëruar mes dy palëve. Situata në Gaza po bëhet gjithnjë e më dramatike, ndërsa numri i viktimave vazhdon të rritet.
