Debati për transparencën e buxhetit të SHISH-it ndez akuza të forta politike, me opozitën që kërkon llogari dhe shumicën që mbron procedurat, ndërsa çështjet e sigurisë mbeten në qendër të vëmendjes publike.
Kryetarja e Shërbimit Informativ Shtetëror, Vlora Hyseni, raportoi në Komisionin për Çështjet e Brendshme dhe të Mbrojtjes për projektbuxhetin e institucionit, por mbledhja u tensionua menjëherë pas kërkesës së saj që diskutimi të zhvillohej me dyer të mbyllura. Deputeti i opozitës Flamur Noka kundërshtoi ashpër këtë kërkesë, duke kërkuar transparencë të plotë për fondet e sigurisë.
Hyseni sqaroi se për vitin 2026 është planifikuar një fond prej 3 miliardë lekësh dhe theksoi se disa prej investimeve të parashikuara kërkojnë trajtim të klasifikuar. Ajo kërkoi mirëkuptimin e komisionit për të kaluar në një seancë të mbyllur për pjesën sensitive të raportimit, duke theksuar se informacioni lidhet drejtpërdrejt me funksionimin e shërbimit sekret.
Por Noka deklaroi se çdo përpjekje për të mbyllur mbledhjen dëmton besimin e publikut. Ai akuzoi strukturën për mungesë transparence dhe shtoi se qytetarët kanë të drejtë të dinë se sa buxhet merr SHISH-i dhe pse kërkon fonde shtesë. Noka kujtoi se në 35 vite parlament nuk ka ndodhur një “errësirë e tillë informative”, duke e cilësuar këtë praktikë si tallje ndaj taksapaguesve dhe si përpjekje për t’u “hedhur hi syve qytetarëve”.
Debati u përshkallëzua më tej me ndërhyrjen e deputetit Klevis Balliu, i cili akuzoi SHISH-in se është lënë në gjendje të mjerueshme nga qeveria. Ai theksoi se institucionit nuk i jepen investimet e nevojshme për të parandaluar krimin, duke pretenduar se kjo gjendje është pjesë e një skeme të qëllimshme që i shërben grupeve kriminale dhe shmang kontrollin institucional.
Balliu solli shembuj ku punonjës të Policisë së Shtetit janë kapur të përfshirë në atentate mafioze dhe aktivitete kriminale, duke e cilësuar këtë situatë si “dramën më të madhe të shtetit modern”. Ai përmendi deklaratat e ish-zv.kryeministrit Arben Ahmetaj për lidhjet e qeverisë me krimin e organizuar, duke e paraqitur këtë si provë të kapjes së shtetit.
Në vijim, Balliu u ndal në raportet buxhetore, duke ngritur shqetësimin se SHISH merr vetëm 10% të buxhetit të Policisë së Shtetit. Sipas tij, një shtet që nuk investon në inteligjencë nuk mund të pretendojë se lufton krimin, ndërsa qeveria hesht për shkak të interesave politike.
Ai kujtoi edhe episodin e ndodhur në aeroport, duke vënë në dukje se kur institucionet kyçe si drejtësia, shkollat dhe pikat e transportit nuk janë të sigurta, atëherë siguria kombëtare është në rrezik. Balliu akuzoi shumicën se e përdor komisionin për “show” dhe se mbron pushtetin në vend që të mbrojë shtetin, duke iu referuar edhe çështjes “Aruba” në fund të ndërhyrjes së tij.
Debati shënoi një nga përplasjet më të forta të ditëve të fundit mbi sigurinë kombëtare dhe transparencën e institucioneve, duke e lënë çështjen e buxhetit të SHISH-it në qendër të vëmendjes politike.
