Këshilli i Mandateve ka zhvilluar me dyer të mbyllura mbledhjen për shqyrtimin e kërkesës së SPAK për heqjen e imunitetit të deputetes dhe zv.kryeministres Belinda Balluku, mes debateve të forta për administrimin e provave dhe afatet procedurale.
Gjatë mbledhjes është paraqitur relacioni zyrtar nga kryetari i Këshillit të Mandateve, Niko Peleshi, ndërsa përfaqësuesit e Prokurorisë së Posaçme ende nuk kanë mbajtur qëndrim përfundimtar në sallë. Diskutimet janë përqendruar edhe te fakti që seanca po zhvillohet pa praninë e publikut, me opozitën që ka kërkuar transparencë dhe hapje të mbledhjes, kërkesë e kundërshtuar nga mazhoranca.
Një tjetër pikë përplasjeje ka qenë USB-ja e dorëzuar nga SPAK, e cila përmban rreth 10 mijë faqe materiale hetimore. Përfaqësuesit e opozitës kanë kërkuar që provat të hapen dhe t’u vihen në dispozicion anëtarëve të Këshillit për shqyrtim të plotë, ndërsa nga mazhoranca është kërkuar që materialet të konsultohen vetëm brenda ambienteve të mbledhjes. Prokurori i çështjes ka kërkuar që zarfi me provat të hapet për njohje nga anëtarët e Këshillit.
Avokati mbrojtës i Belinda Ballukut ka kërkuar një afat prej tre javësh për t’u njohur me dokumentacionin voluminoz dhe për të ndërtuar mbrojtjen, kërkesë që është mbështetur nga anëtarët e Partisë Socialiste. Nga ana tjetër, prokurori Dritan Prençi ka vlerësuar se një afat prej 3 deri në 5 ditësh është i mjaftueshëm për njohjen me aktet dhe për vijimin e hetimit pa zvarritje.
Gjatë diskutimeve, deputeti i opozitës Gent Strazimiri ka ngritur shqetësimin se procesi po zvarritet, duke kërkuar një balancë mes të drejtës për mbrojtje dhe nevojës për efikasitet hetimor. Prokurori Prençi ka përsëritur se, sipas vlerësimit të tij, afati optimal mbetet 3–5 ditë.
Në fund të mbledhjes, opozita ka kërkuar shtyrjen e shqyrtimit për ditën e hënë, ndërsa mazhoranca ka propozuar vijimin e procedurës më 19 janar. Vendimi përfundimtar mbi afatet dhe hapat e mëtejshëm pritet të merret nga Këshilli i Mandateve.
