Rreth 1500 fëmijë dhe nxënës përfitojnë nga projekti i gjelbër që sjell kursim energjie dhe përmirësim të kushteve në institucionet arsimore të Lushnjës.
Lushnja mirëpriti një zhvillim të rëndësishëm mjedisor dhe energjetik ditën e djeshme, me prezencën e përfaqësueses së Ambasadës Gjermane në Tiranë, znj. Renate Quelle. Gjatë një takimi të hapur, u prezantua projekti i përfunduar për instalimin e paneleve fotovoltaike në gjashtë institucione arsimore të qytetit.
Projekti përfshin një çerdhe, tre kopshte dhe dy shkolla të Bashkisë Lushnje, dhe synon jo vetëm uljen e konsumit të energjisë elektrike, por edhe krijimin e një ambienti më të shëndetshëm për rreth 1500 fëmijë dhe nxënës që ndjekin këto institucione.
Ky investim është pjesë e programit të Bashkimit Evropian për Tranzicionin e Energjisë, në kuadër të Marrëveshjes së Kryetarëve të Bashkive në Ballkanin Perëndimor dhe Turqi, dhe zbatohet nga GIZ me financim të përbashkët nga BE dhe Qeveria Gjermane.
Në takim, kryetarja e Bashkisë Lushnje, Eriselda Sefa, shprehu falënderimet e saj për përfaqësuesen e Ambasadës Gjermane, duke vënë në dukje rëndësinë e këtyre investimeve për zhvillimin e qëndrueshëm të komunitetit. Ajo theksoi se kursimi i energjisë dhe përmirësimi i infrastrukturës janë hapa konkretë drejt një të ardhmeje më të gjelbër.
Gazetari Ndriçim Gjoshi raporton se takimi u zhvillua në praninë e drejtuesve vendorë dhe partnerëve të projektit, duke përmbyllur me mesazhin se Lushnja po ecën me hapa të sigurt drejt një tranzicioni të gjelbër që përfshin edhe brezin e ri.
