Një vrojtim i fundit i realizuar në Shqipëri ka nxjerrë në pah një shqetësim të madh për përdorimin e antibiotikëve në fermat blegtorale, me 40% të fermerëve që raportojnë përdorimin e këtyre medikamenteve tek kafshët.
Vrojtimi është realizuar nga Organizata Botërore e Ushqimit (FAO) dhe ka përfshirë 525 ferma, 29 veterinerë dhe 21 farmacitë veterinare, dhe ka nxjerrë në pah rëndësinë e përdorimit të kontrolluar të antibiotikëve për të parandaluar rritjen e rezistencës ndaj tyre tek njerëzit.
Rezultatet e anketës tregojnë se përdorimi i antibiotikëve është më i përhapur në fermat më të mëdha. Përdorimi është i lartë te fermat që mbarështojnë dhi e dele, me 53.2%, si dhe tek fermat e lopëve të qumështit dhe të mishit, ku përdorimi arrin deri në 50%. Për më tepër, përdorimi i antibiotikëve në ferma të pulave dhe fermat shtëpiake është gjithashtu i dukshëm, me shifra përkatëse prej 29% dhe 23.3%.
Në Evropë, përdorimi i antibiotikëve ka pësuar një ulje të ndjeshme për shkak të një direktive që kufizon përdorimin e tyre në bagëti, ku mes viteve 2011 dhe 2022 është raportuar një rënie prej 50%. Ky trend është pjesë e përpjekjeve globale për të luftuar fenomenin e rezistencës ndaj antibiotikëve, që rrezikon shëndetin publik dhe mund të shkaktojë sëmundje të rënda dhe kronike.
Një nga rreziqet më të mëdha të përdorimit të tepërt të antibiotikëve është formimi i baktereve të rezistueshme, që mund të shkaktojnë infeksione të vështira për t’u trajtuar. Kjo jo vetëm që ndikon tek shëndeti i kafshëve, por rrezikon gjithashtu njerëzit, përmes konsumit të mishit dhe produkteve të qumështit të kontaminuara.
Nga anketimi ka dalë në pah edhe një problem tjetër: shumica e fermerëve shqiptarë nuk kanë arsim apo trajnim të mjaftueshëm mbi shëndetin e kafshëve dhe përdorimin e barnave. Për më tepër, evidencat e përdorimit të antibiotikëve mbahen më mirë nga veterinerët dhe farmacitë veterinare, sesa nga vetë fermerët, duke sugjeruar një mungesë të praktikave të mira menaxheriale në këtë fushë.
Edhe pse përdorimi i antibiotikëve në shumicën e rasteve është një masë e nevojshme për të trajtuar sëmundjet, vetëm një numër i vogël i fermerëve ndiqnin udhëzimet e plotë për administrimin e tyre. Gjithashtu, një pjesë e fermerëve e kanë përdorur antibiotikët në doza më të ulëta dhe për periudha më të shkurtra se ato që rekomandoheshin nga profesionistët.
Një tjetër shqetësim është se 67% e fermerëve raportuan se ata gjithmonë ose shpesh merrnin antibiotikët me recetë, megjithatë, shumë prej tyre nuk ishin të informuar mbi pasojat që sjell përdorimi i këtyre substancave. Ndërkohë, një pjesë e madhe e profesionistëve të fushës, përfshirë veterinere dhe farmacistë, raportuan se kishin vërejtur një ulje të efikasitetit të antibiotikëve gjatë trajtimeve.
Në përfundim, përdorimi i antibiotikëve në fermat blegtorale shqiptare kërkon një rregullim më të fortë dhe një rritje të ndërgjegjësimit për rreziqet e rezistencës ndaj antibiotikëve. Trajnimi i fermerëve dhe një mbikëqyrje më e fortë do të ishin hapa të domosdoshëm për të ruajtur shëndetin e kafshëve dhe të njerëzve, si dhe për të parandaluar përhapjen e baktereve të rezistencës që kërcënojnë të ardhmen e shëndetit publik.
