Ambasada Britanike në Tiranë ka reaguar në prag të mbledhjes së Këshillit të Lartë të Prokurorisë, ku nesër pritet të zgjidhet drejtuesi i ri i Prokurorisë së Posaçme. Ky proces është cilësuar si një moment i rëndësishëm për forcimin e shtetit të së drejtës dhe luftën kundër korrupsionit në vend.
Sipas deklaratës së publikuar në rrjetet sociale, Ambasada thekson se Këshilli i Lartë i Prokurorisë duhet të garantojë një procedurë të lirë, të drejtë dhe transparente në përzgjedhjen e pasuesit të Altin Dumanit.
Në reagim, përfaqësia diplomatike e Mbretërisë së Bashkuar shprehet se zgjedhja e drejtuesit të SPAK është thelbësore për ecurinë e reformës në drejtësi dhe për përparimin institucional të Shqipërisë.
Ambasada shton gjithashtu se Londra zyrtare është e gatshme të bashkëpunojë me drejtuesin e ri të SPAK dhe se synimi i përbashkët mbetet forcimi i bashkëpunimit dhe i rezultateve kundër korrupsionit dhe krimit të organizuar.
