Kryeministri paralajmëron ndëshkim për zyrtarët dhe policët që kanë mbyllur sytë para ndërtimeve të paligjshme në zonën turistike të Kepit të Rodonit.
Aksioni për prishjen e ndërtimeve të paligjshme në bashkinë e Durrësit është shtrirë këtë të hënë edhe në zonën e mbrojtur të Kepit të Rodonit. Kryeministri Edi Rama publikoi pamje nga terreni, duke deklaruar se ky proces nuk do të ndalet derisa të shembet çdo objekt që ka uzurpuar hapësira publike apo natyrore.
Në reagimin e tij, Rama nuk kurseu kritikat ndaj Policisë së Shtetit dhe inspektoriateve përkatëse, duke i akuzuar se kanë mbyllur sytë përballë ndërtimeve abuzive. Ai paralajmëroi se “symbyllurit” do të ndëshkohen nga ligji, njësoj si ata që kanë kryer shkeljet.
Kryeministri theksoi se prishjet nuk janë një aksion sporadik, por një proces i vazhdueshëm që do të shoqërohet me një paketë të re masash ligjore. Sipas tij, kjo paketë synon rritjen e forcës goditëse të ligjit ndaj personave përgjegjës, duke përfshirë jo vetëm ndërtuesit, por edhe zyrtarët e çdo niveli që kanë lejuar këto abuzime.
Pamjet e publikuara tregojnë fadromat në punë për shembjen e ndërtimeve pranë bregdetit, në një zonë të cilësuar si një ndër mrekullitë natyrore të vendit. Rama u shpreh se këto hapësira janë abuzuar për qëllime fitimi në dëm të mjedisit dhe interesit publik.
Operacioni në Kepin e Rodonit është pjesë e një fushate më të gjerë që ka nisur në disa zona të vendit për të rikthyer hapësirat e uzurpuara. Autoritetet premtojnë se ky proces do të vazhdojë pa kompromis deri në eliminimin e ndërtimeve të paligjshme.
Në deklaratat e tij, Rama ka bërë të qartë se goditja e abuzuesve do të jetë e dyfishtë: shembja e objekteve dhe ndëshkimi penal i të gjithë atyre që kanë kontribuar në shkeljen e ligjit. Kjo, sipas tij, është mënyra e vetme për të vendosur rendin dhe për të mbrojtur pasuritë natyrore të vendit.
