Policia në Shkodër gjeti dhe asgjësoi mbi 8 mijë bimë kanabis, ndërsa pesë kryetarë fshatrash u proceduan penalisht për shpërdorim detyre.
Operacioni policor i koduar “Koordinata” ka vijuar me intensitet në qarkun e Shkodrës, duke sjellë një tjetër goditje ndaj kultivimit të bimëve narkotike. Forcat e rendit kanë ushtruar kontrolle të gjera në disa zona të thella malore, ku u zbuluan dhe asgjësuan 8028 bimë të dyshuara si cannabis sativa.
Në njësitë administrative Pult dhe Shosh, efektivët e Komisariatit të Shkodrës zbuluan 7073 bimë kanabisi. Pas veprimeve procedurale, Prokuroria nisi procedim penal për pesë kryetarë fshatrash, të cilët akuzohen për “Shpërdorim detyre” dhe “Moskallëzim krimi”.
Mes tyre janë kryetarët e fshatrave Ndrejaj, Lekaj, Nicaj, Plan dhe Kir. Emrat e tyre janë referuar për hetime, ndërsa autoritetet theksojnë se neglizhenca apo bashkëpunimi i mundshëm në kultivimin e drogës nuk do të tolerohet.
Ndërkohë, në njësinë administrative Kelmend, forcat e Komisariatit të Malësisë së Madhe gjetën dhe asgjësuan 780 bimë kanabisi. Po ashtu, në Temal të Vaut të Dejës u zbuluan 175 bimë të tjera, duke e çuar totalin e bimëve të asgjësuara në mbi 8 mijë.
Policia e qarkut Shkodër deklaron se kontrollet do të vijojnë në të gjitha njësitë administrative, me synimin për të çrrënjosur këtë fenomen kriminal dhe për të vënë para drejtësisë çdo person të përfshirë.
Operacioni “Koordinata” pritet të shtrihet edhe në zona të tjera problematike të veriut, duke u bërë një nga aksionet më të mëdha antikanabis të këtij viti.
