Një operacion i suksesshëm policor ka çuar në arrestimin e një 23-vjeçari, i cili u kap në flagrancë duke marrë një pako me lëndë narkotike cannabis sativa me përqindje të lartë THC, që ishte trafikuar nga SHBA nëpërmjet shërbimit postar.
Në vijim të operacioneve të njëpasnjëshme për të luftuar aktivitetet kriminale të trafikimit të lëndëve narkotike, Policia e Tiranës ka arritur të finalizojë një tjetër operacion të koduar “Dërgesa”. Ky operacion, i organizuar dhe finalizuar nga Seksioni për Hetimin e Narkotikëve në bashkëpunim me Forcën e Posaçme Operacionale të DVP Tiranë dhe komisariatin e Policisë Rinas, kishte si objektiv goditjen e trafikimit të lëndëve narkotike përmes shërbimit postar.
Si rezultat i hetimeve disamujore të udhëhequra nga Prokuroria pranë Gjykatës së Shkallës së Parë të Juridiksionit të Përgjithshëm Tiranë, është arrestuar shtetasi italian M. M., 23 vjeç, banues në Tiranë. Ky i fundit ishte kapur në flagrancë në një degë postare, duke marrë një pako me rreth 475 gramë cannabis sativa me përqindje të lartë THC. Dyshohet se kjo lëndë ishte trafikuar nga SHBA përmes shërbimit postar.
Gjatë operacionit, policia ka realizuar kontrolle dhe në banesën e të arrestuarit, ku janë sekuestruar edhe 442 gramë cannabis sativa, një shumë e konsiderueshme parash dhe 7 celularë. Lëndët narkotike që u sekuestruan kanë një vlerë të lartë, me një vlerë rreth 20,000 euro për 917 gramët e sekuestruar në total.
Këto veprime janë pjesë e përpjekjeve të Policisë së Shtetit për të goditur me forcë rrjetet e trafikimit të lëndëve narkotike, duke shfrytëzuar të gjitha mjetet e mundshme dhe duke bashkëpunuar me agjenci të ndryshme, për të siguruar ndalimin e aktiviteteve të tilla kriminale.
Materialet procedurale do t’i referohen Prokurorisë së Tiranës për të vijuar me hetimet dhe procedurat përkatëse ndaj personave të përfshirë në këtë aktivitet kriminal.
