Policia ka finalizuar në Gjirokastër dhe Sarandë një operacion kundër falsifikimit të dokumenteve, duke arrestuar tre persona të dyshuar për përdorim dhe qarkullim të dokumenteve të rreme.

Operacioni, i koduar “Autenticiteti”, është zhvilluar pas një hetimi disamujor të kryer nga strukturat për hetimin e krimeve ekonomiko-financiare, në bashkëpunim me Prokurorinë e Gjirokastrës. Si rezultat, janë goditur tre raste të veçanta të përdorimit të dokumenteve të falsifikuara.

Sipas hetimeve, një 51-vjeçar nga Gjirokastra, administrator i një subjekti që operon në fushën e transportit ndërkombëtar të mallrave, dyshohet se kishte pajisur 16 kamionë të kompanisë me certifikata të falsifikuara, përmes të cilave autorizohej kryerja e aktivitetit tregtar. Gjatë kontrollit në ambientet e subjektit, policia ka sekuestruar të gjitha dokumentet e dyshuara si të rreme.

Në kuadër të të njëjtit operacion, janë arrestuar edhe dy persona të tjerë, një 45-vjeçar nga fshati Nepravishtë dhe një 38-vjeçar nga Saranda. Gjatë kontrolleve në banesat e tyre, shërbimet e policisë kanë gjetur dhe sekuestruar diploma dhe lista notash, të dyshuara si të falsifikuara, të cilat u morën në cilësinë e provës materiale.

Në total, gjatë operacionit janë sekuestruar 20 dokumente të dyshuara false. Autoritetet bëjnë me dije se hetimet po vijojnë për të identifikuar persona të tjerë që mund të jenë të përfshirë në këtë veprimtari të kundërligjshme.

Materialet procedurale i janë referuar Prokurorisë së Gjirokastrës për veprime të mëtejshme ligjore, ndërsa policia sinjalizon se falsifikimi i dokumenteve, veçanërisht në sektorë të ndjeshëm si transporti dhe arsimi, mbetet një prioritet i vazhdueshëm për goditje penale.