GJKKO ka vendosur masën “arrest me burg” për oficerin e Antiterrorit, Igli Haxhiaj, i arrestuar si rezultat i operacionit të përbashkët mes prokurorisë së Breshias dhe SPAK, ku ai dyshohet për përfshirje në trafikun e lëndëve narkotike nga Amerika Latine dhe Shqipëria drejt Italisë.
Në seancën e zhvilluar, Haxhiaj mohoi të ketë qenë pjesë e veprimtarisë kriminale, duke deklaruar se llogaria në platformën SKY ECC nuk i përket atij. Ai tha se në këtë procedim ka vepruar si pjesë e grupit hetimor dhe se autoritetet italiane i kanë dhënë një certifikatë vlerësimi për punën e tij.
Gjatë mbrojtjes, ai pohoi:
“Të dy prokurorët e dinë se unë kam qenë bashkëpunëtor dhe pjesë e hetimeve. Madje pala italiane më ka dhënë edhe fletëlavdërim.”
Ai iu drejtua edhe prokurorëve të çështjes duke theksuar se ata “e dinë që ai ka qenë pjesë e grupit hetimor dhe ka dhënë kontribut në proces”.
Nga ana tjetër, avokatja e tij deklaroi se nuk ekziston asnjë provë teknike që ta lidhë Haxhiaj me PIN-in HY67U7 të përdorur në komunikimet e SKY ECC. Sipas saj, masa e sigurisë është bazuar kryesisht në transkriptime të pjesshme dhe të paautentifikuara, pa mbështetje shkencore apo materiale.
Mbrojtja theksoi se nuk është sekuestruar asnjë pajisje, kartë SIM, celular, IP-adresë, IMEI, log serveri apo metadata që të vërtetojnë përdorimin e këtij PIN-i. Gjithashtu, komunikimet nuk përmbajnë emra, pseudonime apo të dhëna personale që ta identifikojnë të dyshuarin.
Sipas mbrojtjes, identifikimi i PIN-it mbetet i paprovuar dhe pa asnjë bazë të verifikueshme teknike apo shkencore.
