Një tërmet me magnitudë 5.8 tronditi Turqinë Perëndimore dhe ishujt grekë, duke shkaktuar një viktimë dhe shumë të plagosur nga paniku i shkaktuar.
Një tërmet i fuqishëm, me epiqendër në afërsi të qytetit bregdetar Marmaris, goditi mbrëmjen e së hënës Turqinë perëndimore, duke u ndjerë gjerësisht edhe në ishujt grekë të Dodekanezit. Autoritetet turke njoftuan se një vajzë 14-vjeçare humbi jetën në qytetin Fethiye, pasi pësoi një sulm paniku gjatë lëkundjeve të forta. Vajza u dërgua në spital, por nuk mundi t’u mbijetojë pasojave.
Sipas Qendrës Evropiane të Sizmologjisë, tërmeti kishte një thellësi prej 68 kilometrash, çka bëri që lëkundjet të ndiheshin në një zonë të gjerë. Në ishullin Rodos të Greqisë, që ndodhet pranë kufirit me Turqinë, shumë banorë dhe turistë përjetuan panik nga tërmeti, duke dalë me shpejtësi jashtë ndërtesave.
Raportohet se të paktën 69 persona u plagosën, kryesisht për shkak të tentativave për të kërkuar siguri duke kërcyer nga lartësi gjatë panikut. Për fat të mirë, në ishullin Rodos nuk janë shënuar dëmtime serioze apo viktima, ndërsa pushuesit e shumtë rrëfejnë se u zgjuan nga lëkundje të forta që tronditën zonën.
Agjencia turistike TUI u bëri thirrje turistëve të ruajnë qetësinë dhe të ndjekin udhëzimet e sigurisë të ofruara nga autoritetet lokale ose akomodimi ku po qëndrojnë. Ekspertët sizmologë grekë, përfshirë Efthimios Lekkas, theksuan për ERT News se tërmeti, për shkak të thellësisë së madhe, nuk pritet të shkaktojë pasoja të rënda në sipërfaqe.
Lekkas sqaroi se nuk priten tërmete të tjerë të fortë pas këtij, ndërsa përjashtoi mundësinë e një cunami apo pasgoditjesh të shumta. Ai shtoi se, megjithëse tërmeti ishte i fortë dhe u ndje gjerësisht në Rodos dhe zonat përreth, situata është nën kontroll dhe nuk parashikohen dëme të mëdha materiale.
Autoritetet në të dy vendet vijojnë të monitorojnë situatën, ndërsa ekspertët vazhdojnë vlerësimet për sigurinë e zonave të prekura, duke garantuar banorët dhe turistët se nuk ka rrezik të shtuar për jetën.
