Pas dy javëve të para në Kategorinë e Parë, SK Lushnja ka grumbulluar dy barazime dhe kërkon fitoren e parë për të mbajtur gjallë ambiciet.
Kampionati i Kategorisë së Parë në futboll nisi më 23 gusht, ku Sport Klub Lushnja luajti në transfertë ndaj Pogradecit. Takimi u mbyll me rezultatin 0-0, pa gola dhe me një lojë të kujdesshme nga të dyja skuadrat.
Në javën e dytë, verdhejeshilët u rikthyen në stadiumin “Roza Haxhiu” përballë Skënderbeut të Korçës. Edhe kjo ndeshje përfundoi në barazim, kësaj here 1-1, duke e çuar në dy pikë totalin e Lushnjës pas dy javëve të para.
Gazetari sportiv Alban Alushi, i ftuar nga TV Apollon së bashku me gazetarin Ndriçim Gjoshi, analizoi ecurinë e deritanishme të skuadrës. Ai vlerësoi organizimin taktik dhe qetësinë në lojë, por nënvizoi nevojën për më shumë efikasitet në finalizim.
Alushi theksoi se nëse objektivi është një renditje e lartë dhe ngjitja në Superligë, duhet të ketë përforcime në repartin sulmues dhe më shumë guxim në sulm.
Sipas tij, dy barazime në nisje nuk janë domosdoshmërisht negative, por është vendimtare që Lushnja të marrë një fitore në javët e ardhshme për të ruajtur moralin dhe besimin e tifozërisë “verdhejeshile”.
