Nga sot, maturantët fitues në universitetet publike dhe private kanë dy ditë për t’u regjistruar, ndryshe vendi i tyre i kalon kandidatëve në pritje.
Nga data 29 gusht deri më 11 shtator, procesi i regjistrimit për maturantët fitues në universitetet publike dhe private do të zhvillohet në shtatë faza, secila me afat 48-orësh. Ky sistem i ri synon të menaxhojë me efikasitet fluksin e kandidatëve dhe të garantojë që vendet të plotësohen nga ata që kanë realisht interes.
Ministrja e Arsimit, Ogerta Manastirliu, në një reagim në rrjetet sociale, uroi suksese të gjithë të rinjve që do të ulen për herë të parë në auditoret universitare. Ajo gjithashtu theksoi rëndësinë e ndjekjes së hapave të regjistrimit për të siguruar vendin në degën e preferuar.
Sipas rregullave, çdo maturant ka vetëm dy ditë kohë për të përfunduar regjistrimin. Nëse afati tejkalohet, vendi i lëshohet automatikisht një kandidati tjetër në listën e pritjes. Ky mekanizëm parandalon zvarritjen e procesit dhe garanton që asnjë vend të mos mbetet bosh.
Pas përfundimit të të shtatë fazave, parashikohet edhe një periudhë çregjistrimi për studentët që dëshirojnë të ndryshojnë degën. Ata mund të rikthehen në garë për raundin e dytë të regjistrimeve, duke rritur mundësinë për të zgjedhur një program më të përshtatshëm.
Të dhënat e Rrjetit Akademik Shqiptar tregojnë se për këtë vit, programet më të kërkuara janë në fushat e teknologjisë dhe inxhinierisë, të ndjekura nga mjekësia. Në të kundërt, programet e mësuesisë mbeten më pak të preferuara, me vetëm 7.5% të aplikimeve, ndërsa degët profesionale kanë shënuar rritje të ndjeshme.
Këtë vit, mbi 20 mijë maturantë aplikuan për studime universitare në Shqipëri, një shifër rekord që tejkalon vitet e mëparshme. Krahasuar me vitin e kaluar, janë regjistruar 500 aplikime më shumë, duke dëshmuar interesin në rritje për arsimin e lartë.
