SPAK hyn zyrtarisht në një fazë të re drejtimi, teksa kryeprokurori Klodjan Braho ka thirrur për mëngjesin e nesërm mbledhjen e parë me trupën e prokurorëve. Takimi pritet të shërbejë si moment orientimi për vizionin dhe objektivat hetimore të drejtimit të ri.

Braho merr drejtimin e Prokurorisë së Posaçme pas përfundimit të mandatit të Altin Dumanit, i cili drejtoi institucionin për tre vite. Paralelisht me thirrjen e mbledhjes, kryeprokurori i ri ka firmosur edhe ndryshimet në strukturën drejtuese, duke riorganizuar disa prej sektorëve më të rëndësishëm.

Sipas vendimeve të miratuara, Altin Dumani është caktuar në krye të seksionit për marrëdhëniet me jashtë, ndërsa Dorina Bejko do të drejtojë sektorin e hetimit të korrupsionit. Sektori kundër krimit të organizuar i është besuar Vladimir Marës, prokuror i njohur për përvojën në bashkëpunimin me strukturat antimafia italiane.

Rikonfigurimi sjell edhe ndryshime në pozicionet e mëparshme. Dorina Bejko, e cila drejtonte marrëdhëniet me jashtë, kalon në një rol kyç në hetimet për korrupsion, ndërsa Arben Kraja, ish-kryeprokuror i SPAK, është rikthyer më herët në funksionin e prokurorit pas përfundimit të detyrave drejtuese.

Në sektorin e krimit të organizuar, prokurori Adnand Xholi nuk do të ketë më funksion drejtues, por do të vijojë punën si pjesë e këtij departamenti.

Klodjan Braho njihet për një karrierë të gjatë në hetimin penal dhe për përfshirjen në dosje që kanë pasur ndikim të gjerë publik, çka pritet të reflektohet edhe në linjat prioritare të SPAK në periudhën në vijim.