Policia e Fierit procedon disa shtetas për drogë dhe dhunë, ndërsa vijon kërkimi për një 43-vjeçar të zhdukur
Policia e Fierit ka zhvilluar disa operacione gjatë 24 orëve të fundit, duke çuar në arrestime dhe nisjen e hetimeve për një sërë veprash penale që përfshijnë dhunën në familje, goditje me grushta dhe posedim të lëndëve narkotike.
Specialistët për Hetimin e Narkotikëve kanë referuar në Prokurori rastin e dy shtetasve, D. K., 22 vjeç nga Patosi dhe K. K., 40 vjeç nga Fieri. Gjatë kontrollit fizik, atyre u janë gjetur sasi të vogla kokaine ose cannabisi, që janë sekuestruar si prova materiale.
Ndërkohë, në Divjakë është arrestuar në flagrancë A. C., 55 vjeç, banues në fshatin Gërmenjë, pasi dyshohet se ka ushtruar dhunë fizike ndaj bashkëshortes së tij. Arrestimi u krye nga specialistët për Hetimin e Krimeve të Komisariatit të Divjakës.
Në një tjetër rast të dhunës, Komisariati i Policisë Fier ka nisur procedim penal ndaj shtetasit K. M., 53 vjeç, pasi dyshohet se ka goditur me grushte një tjetër qytetar 43-vjeçar. Ngjarja është referuar për hetime të mëtejshme në Prokurori.
Edhe në Lushnjë është regjistruar një rast dhune në familje. Një 41-vjeçare me inicialet Sh. C. dyshohet se ka ushtruar dhunë ndaj bashkëshortit të saj. Policia lokale ka nisur procedimin penal ndaj saj në gjendje të lirë.
Ndërkohë, më 14 korrik është denoncuar në Fier zhdukja e një shtetasi 43-vjeçar me inicialet K. M. Sipas kallëzimit të të atit, Xh. M., djali ishte larguar nga banesa ditën e mëparshme dhe nuk ishte kthyer më.
Të gjitha materialet procedurale janë dërguar në Prokurorinë pranë Gjykatës së Shkallës së Parë Fier, ku priten veprime të mëtejshme ligjore ndaj të dyshuarve. Policia vijon hetimet dhe kërkimet për rastet në fjalë.
