INSTAT njofton për rritje modeste të pasagjerëve ajrorë dhe përshpejtim të trafikut në portet detare gjatë tremujorit të dytë
Sipas të dhënave më të fundit nga INSTAT, lëvizja e pasagjerëve përmes transportit ajror në Shqipëri ka njohur një ngadalësim të dukshëm në tremujorin e dytë të vitit 2025. Numri i udhëtarëve që kanë fluturuar me linja ajrore ishte 3.052.511, duke shënuar vetëm një rritje prej 6% krahasuar me të njëjtën periudhë të vitit të kaluar, kur ishin regjistruar 2.879.158 pasagjerë.
Ky përshpejtim i dobët vjen pas një rritjeje shumë më të fuqishme në tremujorin e dytë të vitit 2024, ku numri i pasagjerëve ishte rritur me 64.7%, duke kaluar nga 1.747.887 në 2.879.158. Situata tregon një ngadalësim në ritmin e rritjes së transportit ajror këtë vit.
INSTAT njofton se në tremujorin e dytë kanë operuar 29 shoqëri ajrore në hapësirën ajrore shqiptare, ku 28 janë të huaja dhe vetëm një shqiptare. Janë regjistruar gjithsej 110.073 fluturime, ku 83.2% e tyre ishin mbikalime, pra kalime në hapësirën tonë ajrore.
Në segmentin e mallrave, volumi i transportuar me ajër ka pësuar një rritje të ndjeshme prej 42.4%, duke arritur në 798.6 ton, nga të cilat 67.5% janë mallra të ardhura dhe 32.5% mallra të nisura nga Shqipëria. Tregtia me mallra përmes ajrit, përfshirë eksportin dhe importin, ka shënuar një rritje prej 2.3%, me një total prej 583 tonësh.
Në kontrast me transportin ajror, trafiku në portet detare shqiptare ka shënuar një përmirësim të dukshëm. Numri i pasagjerëve që udhëtuan përmes porteve në tremujorin e dytë ishte 330.630, duke shënuar një rritje prej 10.9% në krahasim me të njëjtën periudhë të vitit të kaluar.
Porti i Sarandës mbetet pika kryesore për pasagjerët, me 54% të trafikut detar, i ndjekur nga Durrësi me 40.3% dhe Vlora me 5.7%. Ky përshpejtim është më i fortë se viti i kaluar, kur rritja ishte 6.1%.
Sa i përket mallrave, Porti i Durrësit dominon transportin detar në vend, duke përpunuar 93.6% të volumit total me 2.063 mijë ton mallra gjatë tremujorit të dytë të 2025. Ky volum është rritur me 1.4% në krahasim me vitin e kaluar.
Nga portet shqiptare kanë hyrë dhe dalë 276 anije, ku 253 janë të huaja dhe 23 vendase. Numri i anijeve ka pësuar një rritje prej 10%, ndërsa anijet e huaja janë rritur me 16.1% gjatë periudhës së analizuar.
Portet që shërbejnë transportin e pasagjerëve janë Durrësi, Vlora, Saranda dhe Shëngjini, me aktivitet të përqendruar kryesisht në tre portet e para gjatë këtij tremujori. Ky zhvillim tregon një tendencë rikthimi të forcës së transportit detar në Shqipëri, krahas ngadalësimit të lehtë të trafikut ajror.
