Divock Origi, dikur figurë simbolike e Liverpoolit, sot përfaqëson një nga historitë më të paqarta të futbollit evropian. Ndërsa Liverpool dhe Nottingham Forest u përballën fundjavën e kaluar, sulmuesi ndodhej në SHBA duke ndjekur ndeshje të NBA-së, larg fushave të Premier League ku dikur shkroi histori.
Origi mbetet i lidhur me momentet më të mëdha të Liverpoolit në epokën moderne. Ai shënoi në finalen e Ligës së Kampionëve 2019 kundër Tottenham dhe realizoi dy gola në përmbysjen historike ndaj Barcelonës në gjysmëfinale. Një tjetër moment i paharrueshëm ishte goli ndaj Evertonit para tribunës “Kop”, që vulosi fitoren 2-0 ndaj rivalëve të qytetit në një sezon ku skuadra synonte katër trofe.
Jurgen Klopp e vlerësoi publikisht si “legjendë brenda dhe jashtë fushës”, duke e cilësuar sulmues të klasit botëror dhe vendimtar në momentet kyçe. Pas një goli vendimtar ndaj Wolves në dhjetor 2021, trajneri gjerman deklaroi se një ditë do të shkruheshin libra për të dhe pranoi se ndoshta nuk e kishte aktivizuar aq sa duhej. Edhe Andy Robertson ironizoi në rrjetet sociale se një ditë do t’i tregonte fëmijëve statujën e Origit në Anfield.
Megjithatë, sulmuesi belg nuk ishte kurrë zgjedhja e parë në formacion, por shpesh shpërblente besimin kur aktivizohej. Në vitin 2022 ai u largua drejt Milanit me një kontratë katërvjeçare, në moshën 27-vjeçare dhe si fitues i Ligës së Kampionëve, me pritshmëri për një rol më të madh.
Realiteti në Itali rezultoi i vështirë. Origi mbërriti i dëmtuar dhe nuk arriti të sigurojë një vend titullari, duke shënuar vetëm dy gola në 36 paraqitje. Pas një periudhe si zëvendësues i Olivier Giroud, ai humbi besimin e trajnerit Stefano Pioli dhe në vitin 2023 u huazua te Nottingham Forest për të ringritur karrierën në Premier League.
As kjo përpjekje nuk solli kthesë. Në 22 paraqitje në të gjitha kompeticionet me Forest, ai nuk shënoi asnjë gol në ligë, duke luajtur kryesisht nën drejtimin e Nuno Espirito Santo. Me rikthimin te Milani, situata ishte e qartë dhe kontrata u ndërpre me marrëveshje të dyanshme në dhjetor.
