Qiraxhi: Kuvendi i sotëm nuk frymëzon krenari, është kthyer në noter të qeverisë dhe ka humbur misionin përfaqësues
Një kritikë e fortë ndaj përbërjes aktuale të Kuvendit të Shqipërisë ka ardhur nga Migen Qiraxhi, përfaqësues i organizatës “Qëndresa Qytetare”. Ai shprehu shqetësimin për rënien drastike të nivelit përfaqësues në legjislaturën e fundit të Parlamentit.
Qiraxhi theksoi se, në të kaluarën, Kuvendi kishte në përbërje figura të shquara që lanë gjurmë në historinë kombëtare, duke përmendur emra si Gjergj Fishta, Luigj Gurakuqi, Ndre Mjeda dhe Ahmet Zogu. Ndërsa sot, sipas tij, emrat që përfaqësojnë legjislaturën janë të tjerë, të panjohur për vlera publike dhe pa ndikim në përmirësimin e jetës politike të vendit.
“Nëse dikur krenoheshim me Gjergj Fishtën në Kuvend, sot na thuhet se përfaqësues do të jenë figura si Sara Mile apo Zegjine Çaushi. Nuk po flas për individët si persona, por për simbolikën që përfaqësojnë në përballje me traditën tonë politike,” – tha Qiraxhi.
Ai e cilësoi këtë kalim si një përplasje dramatike mes së kaluarës dhe realitetit aktual, duke e përshkruar Kuvendin e sotëm si të degraduar në një rol thjesht formal, pa funksionin e tij thelbësor të mbikëqyrjes ndaj qeverisë.
Sipas tij, mungesa e debateve serioze dhe kontrollit institucional tregon se Parlamenti është shndërruar në një “noter të qeverisë”, duke humbur plotësisht funksionin kushtetues të kontrollit të ekzekutivit.
Qiraxhi u shpreh se qytetarët shqiptarë nuk ndihen më të përfaqësuar nga Kuvendi dhe se prania e figurave pa kontribute të njohura për interesin publik po dëmton edhe më shumë besimin tek institucionet.
Në përfundim të intervistës, ai bëri thirrje për reflektim dhe për angazhim më të madh qytetar në përzgjedhjen e përfaqësuesve, në mënyrë që legjislaturat e ardhshme të jenë më dinjitoze dhe më përfaqësuese për interesin kombëtar.
