Çmimet e disa barnave të rimbursueshme kanë pësuar rritje të ndjeshme, në disa raste nga 3% deri në 4000%, duke krijuar një barrë të dyfishtë financiare për qytetarët.

Rritja ka prekur barna jetike si Cefazolina (antibiotik), Metformina për diabetin, REMSIMA për sëmundje autoimune, si dhe barna të përdorura në trajtimin e kancerit të gjirit. Edhe pse këto produkte përfshihen në skemën e rimbursimit nga Fondi i Sigurimit Shëndetësor, qytetarët raportojnë se po përballen me pagesa më të larta.

Sipas të dhënave, ndryshimet në çmime janë bërë pa debat publik dhe pa transparencë të gjerë institucionale, ndërkohë që lista e barnave të rimbursueshme është një nga mekanizmat më të ndjeshëm socialë.

Problemi qëndron në faktin se qytetari kontribuon në skemën e sigurimit shëndetësor dhe njëkohësisht paguan pjesërisht barnat, pasi farmacitë nuk mund t’i shesin me çmimin e mëparshëm për shkak të përditësimeve të çmimeve.

Ekspertë të shëndetësisë dhe ekonomisë kërkojnë më shumë transparencë në mënyrën se si përcaktohen çmimet e barnave dhe si negocohen ato me distributorët dhe prodhuesit.

Çështja ngre pikëpyetje mbi mekanizmat e kontrollit të çmimeve dhe mbrojtjen e pacientëve, veçanërisht për sëmundjet kronike ku trajtimi është afatgjatë dhe i domosdoshëm.