Kryeministri izraelit Benjamin Netanyahu pritet të informojë presidentin amerikan Donald Trump se çdo zgjerim i programit iranian të raketave balistike përbën një kërcënim serioz për sigurinë rajonale dhe mund të kërkojë reagim të menjëhershëm.
Sipas informacioneve, autoritetet izraelite shprehin shqetësim të shtuar se Irani po rikthen dhe zgjeron kapacitetet e prodhimit të raketave balistike, pavarësisht dëmeve të pësuara nga sulmet ushtarake izraelite më herët gjatë këtij viti. Zyrtarë të lartë izraelitë po përgatisin vlerësime të reja për situatën dhe pritet t’ia paraqesin presidentit amerikan opsione konkrete për veprime të mëtejshme.
Burime pranë qeverisë izraelite bëjnë me dije se ekzistojnë gjithashtu dyshime se Teherani po rindërton disa objekte të pasurimit bërthamor që ishin goditur nga sulme ajrore amerikane në muajin qershor. Megjithatë, sipas të njëjtave burime, kërcënimi më i menjëhershëm lidhet me përpjekjet e Iranit për të rikthyer plotësisht kapacitetet e prodhimit të raketave balistike dhe për të riparuar sistemet e mbrojtjes ajrore, të cilat janë dëmtuar ndjeshëm.
Donald Trump dhe Benjamin Netanyahu pritet të zhvillojnë një takim në fund të këtij muaji në rezidencën Mar-a-Lago, në Florida. Gjatë këtij takimi, kryeministri izraelit pritet të theksojë se përshpejtimi i programit raketor iranian përbën rrezik jo vetëm për Izraelin, por edhe për stabilitetin e Lindjes së Mesme dhe interesat strategjike të Shteteve të Bashkuara.
Netanyahu pritet të argumentojë se situata kërkon koordinim të ngushtë me Uashingtonin dhe mund të përfshijë mbështetje ose pjesëmarrje amerikane në operacione të reja ushtarake, nëse Teherani vijon përpjekjet për forcimin e kapaciteteve të tij ushtarake.
