Kryeministri Benjamin Netanyahu thekson mbështetjen e SHBA-së dhe përkushtimin për të parandaluar Iranin nga posedimi i armëve bërthamore
Kryeministri izraelit Benjamin Netanyahu doli para gazetarëve jashtë Spitalit Soroka në Beersheba, i cili u godit nga një raketë iraniane. Gjatë deklaratës së tij, ai tregoi se djali i tij ishte detyruar të anulonte ceremoninë martesore dy herë për shkak të sulmeve të vazhdueshme.
Në fokus të fjalës së Netanyahut ishte partneriteti i ngushtë me Shtetet e Bashkuara, ku ai theksoi besimin e plotë ndaj presidentit amerikan Donald Trump. “Ai është një mik i jashtëzakonshëm i Izraelit dhe i popullit hebre,” deklaroi Netanyahu, duke e cilësuar Trumpin si një udhëheqës me vendosmëri dhe qartësi të jashtëzakonshme.
Netanyahu ritheksoi se Izraeli do të ndërmarrë çdo hap të nevojshëm për të eliminuar kërcënimin ekzistencial që, sipas tij, vjen nga programi bërthamor i Iranit. “Ne jemi të përkushtuar për të shkatërruar kërcënimin e shfarosjes bërthamore që varet mbi Izraelin,” deklaroi ai.
Ai vuri theksin te bashkëpunimi i fortë me SHBA-në, duke përmendur se është në kontakt të përditshëm me presidentin Trump. Sipas tij, pozicioni amerikan për të mos lejuar Iranin të zhvillojë armë bërthamore është i qartë dhe i palëkundur.
Netanyahu tha se mënyra për ta ndalur Iranin është ndalimi i pasurimit të uraniumit. “Është kaq e thjeshtë. Ata patën mundësi për negociata, por preferuan ta sfidojnë,” tha ai, duke shtuar se Trump është një njeri që nuk pranon lojëra.
I pyetur për mundësinë e përfshirjes së SHBA-së në ndonjë kundërpërgjigje ushtarake, Netanyahu u shpreh se ky është një vendim që i takon vetëm presidentit Trump. Megjithatë, ai nënvizoi se ndihma amerikane për mbrojtjen ajrore të Izraelit ka qenë thelbësore në përballjen me kërcënimet.
Në fund, Netanyahu përsëriti qëndrimin e tij të prerë: “Irani nuk do të ketë armë bërthamore. Ne dhe SHBA jemi të përkushtuar që ta parandalojmë këtë me çdo kusht.”
