Në Pekin u zhvillua një ceremoni festive e organizuar nga Ambasada e Shqipërisë në Kinë, me rastin e 113-vjetorit të shpalljes së pavarësisë së Shqipërisë dhe 76-vjetorit të vendosjes së marrëdhënieve diplomatike mes dy vendeve.
Në aktivitet morën pjesë zëvendësministrja e Punëve të Jashtme të Kinës, Hua Chunying, ambasadorë dhe përfaqësues të trupit diplomatik, media vendase si edhe anëtarë të komunitetit shqiptar në Pekin.
Ambasadori i Shqipërisë, Riza Poda, theksoi rëndësinë e forcimit të marrëdhënieve dypalëshe, me veçanërisht në fushën e bashkëpunimit ekonomik dhe turizmit. Ai nënvizoi se Kina ka qenë partneri i dytë më i madh tregtar i Shqipërisë tri vitet e fundit dhe se numri i vizitorëve kinezë në vend është rritur me 107% gjatë dy viteve të fundit.
Poda rikujtoi se falë mbështetjes së qeverisë kineze, po vijojnë negociatat për vendosjen e fluturimeve direkte mes Shqipërisë dhe Kinës, të cilat pritet të finalizohen së shpejti.
Zëvendësministrja Hua Chunying vlerësoi qëndrimin e qeverisë shqiptare ndaj marrëdhënieve me Kinën dhe konfirmoi mbështetjen e vazhdueshme kineze për projektet e përbashkëta. Ajo theksoi se Kina është e gatshme të forcojë bashkëpunimin dhe të mbetet një partnere e besueshme në proceset e modernizimit të të dy vendeve.
Ceremonia u shoqërua me performanca artistike nga tenori Armaldo Kllogjeri, instrumentistet Kristina Petrollari e Dorina Laro dhe valltarët e ansamblit kombëtar të këngëve dhe valleve, të cilët sollën elementë të traditës muzikore shqiptare.
