Valentino Garavani, një nga figurat më të mëdha dhe më ndikueshme të historisë së modës, është ndarë nga jeta në moshën 93-vjeçare në Romë, qytetin që e zgjodhi si atdhe shpirtëror dhe profesional.
Lajmi shënon fundin e një epoke për modën ndërkombëtare. Fama dhe ndikimi i Valentinos i kapërcyen kufijtë e pasarelave, duke u shndërruar në një referencë kulturore që preku breza të tërë, përtej trendeve dhe stileve kalimtare. Vizionin e tij ai e përmblidhte thjesht: t’i bënte gratë të ndiheshin dhe të dukeshin të bukura, një parim që udhëhoqi gjithë krijimtarinë e tij nga themelimi i shtëpisë së modës në vitin 1959 deri në tërheqjen nga aktiviteti në vitin 2007.
I lindur në Voghera më 11 maj 1932, Valentino tregoi që në fëmijëri një ndjeshmëri të veçantë për estetikën. Pas studimeve në Milano, u transferua në Paris, ku u formua profesionalisht në institucione prestigjioze dhe bashkëpunoi me emra të njohur të haute couture. Në vitin 1959 u rikthye në Itali dhe hapi shtëpinë e tij të modës në Romë, e cila shpejt u shndërrua në një nga qendrat kryesore të modës së lartë italiane.
Një moment kyç në jetën dhe karrierën e tij ishte njohja me Giancarlo Giammetti-n në vitin 1960. Bashkëpunimi i tyre u bë një nga partneritetet më të qëndrueshme dhe më të suksesshme në industrinë e modës, duke i lejuar Valentinos të përqendrohej plotësisht në krijimtari, ndërsa menaxhimi i markës konsolidohej në nivel ndërkombëtar.
Valentino u afirmua përfundimisht në vitet ’60, veçanërisht pas koleksionit të famshëm të vitit 1967, tërësisht në ngjyrë të bardhë, i cili e ngriti shtëpinë e tij të modës në statusin e simbolit të një epoke. Ngjyra e kuqe, e njohur sot si “e kuqja Valentino”, u bë një nga elementet më të dallueshme të stilit të tij, por trashëgimia e tij shkon shumë përtej një tonaliteti apo siluete.
Krijimet e tij u veshën nga figura ikonike të jetës publike, përfshirë Jackie Kennedy, familje mbretërore dhe yje të kinemasë botërore. Gjatë karrierës së tij, gjashtë aktore fituan çmimin Oscar të veshura me fustane të firmës Valentino, duke e përforcuar reputacionin e tij si mjeshtër i veshjeve për momente historike.
Në vitin 1998, Valentino shiti markën për 300 milionë dollarë, duke ruajtur megjithatë një rol aktiv në drejtimin artistik deri në tërheqjen e tij. Lamtumira nga moda aktive u shënua në vitin 2007 me një seri eventesh madhështore në Romë, ndërsa trashëgimia e tij vijoi përmes drejtimit të ri kreativ të shtëpisë së modës.
Edhe pas largimit nga pasarelat, Valentino mbeti një figurë qendrore e modës, ndërsa dokumentari i vitit 2009 mbi jetën dhe karrierën e tij e riktheu vëmendjen publike mbi ndikimin e jashtëzakonshëm të veprës së tij.
Me ndarjen nga jeta të Valentino Garavanit, bota e modës humbet një nga arkitektët e saj më të rëndësishëm, një krijues që e shndërroi elegancën në gjuhë universale dhe la pas një trashëgimi që do të vazhdojë të frymëzojë breza të tërë.
