Katër astronautë pritet të nisen javën e ardhshme drejt Stacionit Ndërkombëtar Hapësinor (ISS), me qëllim riorganizimin e ekuipazhit pas një evakuimi mjekësor urgjent të misionit të mëparshëm.

Sipas njoftimit, ekuipazhi Crew-12 do të ngrihet më 11 shkurt në bordin e raketës SpaceX Falcon 9, për të rikthyer sa më shpejt ekuipazhin e plotë prej shtatë anëtarësh në stacionin hapësinor.

Më herët gjatë kësaj jave, SpaceX kishte pezulluar përkohësisht fluturimet e raketës Falcon 9, për shkak të hetimeve mbi një problem teknik të identifikuar në motorin e fazës së dytë. Pas përfundimit të verifikimeve, autoritetet përkatëse kanë dhënë lejen për rikthimin e raketës në fluturim.

Pezullimi i përkohshëm kishte ngritur shqetësime për një vonesë të mundshme të misionit Crew-12, por nisja tashmë është konfirmuar.

Misioni i ri do të zëvendësojë Crew-11, i cili u kthye në Tokë rreth një muaj më herët nga sa ishte planifikuar, në evakuimin e parë mjekësor në historinë e Stacionit Ndërkombëtar Hapësinor. Pas këtij zhvillimi, laboratori hapësinor, që orbiton rreth 400 kilometra mbi Tokë, ka funksionuar me një ekuipazh minimal prej tre personash. NASA nuk ka dhënë detaje mbi problemin shëndetësor që çoi në ndërprerjen e misionit të mëparshëm.