Mario Mitaj po kalon një sezon të suksesshëm në Arabinë Saudite, ku është duke u përshtatur në një kampionat dhe ekip të ri.
Ish-mbrojtësi i Lokomotivës së Moskës ka treguar se ndryshimet e mëdha në karrierën e tij nuk e kanë penguar të shfaqë cilësitë e tij të larta, duke bërë që Al Ittihad të vendosë ta blejë përfundimisht kartonin e tij. Në një intervistë të gjatë për kanalin zyrtar të klubit arab në YouTube, Mitaj ka folur për aventurën e tij arabe, marrëdhëniet me shokët e skuadrës dhe idhullin e tij, Marcelo.
Për Mitajn, ky ka qenë një periudhë e rëndësishme në karrierën e tij, ku ka mësuar shumë nga shokët e skuadrës dhe ka përmirësuar vazhdimisht performancën e tij. Ai pranon se ende është duke mësuar çdo ditë, veçanërisht nga futbollistët me më shumë përvojë që luajnë te Al Ittihad. “Ata më ndihmojnë të rritem,” tha ai, duke shpjeguar se përpiqet të mos futet në panik kur është në fushë, dhe fokusohet te loja që ai di të bëjë më së miri.
Marcelo si model
Për Mitajn, një nga modelet e tij më të mëdhenj ka qenë Marcelo, mbrojtësi i famshëm i Real Madridit. “Jam rritur duke e parë dhe gjithmonë e kam konsideruar atë si një nga mbrojtësit e majtë më të mirë në botë,” tha ai, duke theksuar se ky është një lojtar që e ndihmon të rritet dhe të zhvillohet si futbollist.
Në përpjekjet për të krijuar një ambient të këndshëm në ekip, Mitaj gjithashtu ka përmendur disa nga shokët e skuadrës që bëjnë më shumë shaka, siç janë Shanqeti, Aboud dhe Sagur. Sipas tij, këta lojtarë e ndihmojnë të ruajë një atmosferë pozitive dhe të relaksuar.
Ndërsa përsa i përket ndeshjeve të preferuara, Mitaj përmend derbit ndaj Al Ahli dhe Al Nasr, dy përballje ku ai ka pasur mundësi të luajë mirë dhe ku skuadra e tij ka arritur fitore të rëndësishme. “Për mua, ato janë ndeshjet më të bukura,” tha ai, duke treguar kënaqësinë që ka në të tilla përballje.
Karim Benzema, i cili është një shok i skuadrës te Al Ittihad, është një tjetër figurë që Mitaj ka vlerësuar shumë. Ai e përshkruan Benzemanë si një njeri të thjeshtë dhe të gatshëm të ndihmojë të gjithë, duke e quajtur atë një person të jashtëzakonshëm për të pasur në ekip.
Mitaj gjithashtu ka ndarë formacionin e tij të ëndrrave, ku ka përfshirë emra të mëdhenj si Messi, Iniesta, Ronaldo dhe Neymar. Në këtë formacion, ai ka vendosur që Marcelo të jetë mbrojtësi i majtë, një pozicion që ai e njeh shumë mirë dhe ku ai beson se mund të shpalosë aftësitë e tij më të mira.
Për sa i përket të ardhmes, Mitaj pranon se ka ende shumë për të arritur dhe se duhet të vazhdojë të rritet si lojtar. “Do të rritem dhe do të vazhdoj të luaj për disa vite që të mund të përfshihem në formacionin e ëndrrave të të tjerëve,” tha ai. Ai gjithashtu thekson se ka marrë një pritje të ngrohtë dhe respekt nga tifozët e Al Ittihad, një mbështetje që e ka motivuar të japë më të mirën në çdo ndeshje.
Në fund, Mitaj ka shprehur se pozicioni ku ndihet më i sigurt dhe ku ai ka mundësinë të shpalosë më shumë potencialin e tij është si mbrojtës i majtë, një rol që ai e njeh dhe që i lejon të japë maksimumin në çdo ndeshje.
