Në Prishtinë nis shqyrtimi fillestar për dosjen e rezervave shtetërore, ku në qendër të akuzave është ministrja në detyrë e Industrisë, Ndërmarrësisë dhe Tregtisë, Rozeta Hajdari. Prokuroria Speciale ka ngritur aktakuzë kundër saj dhe tre personave të tjerë, duke pretenduar se në vitin 2022 është shkaktuar dëm i madh financiar për shtetin përmes blerjeve të mallrave që nuk kanë mbërritur kurrë në Kosovë.
Prokuroria thotë se Hajdari, së bashku me zyrtarët Irfan Lipovica dhe Hafiz Gara, ka vepruar në mënyrë të tillë që të përfitonin të tretë persona të lidhur me procesin, duke e dëmtuar buxhetin me një shifër që arrin deri në tre milionë euro. Bëhet fjalë për blerje të sasisë së vajit dhe grurit në Poloni dhe Turqi, të cilat sipas aktakuzës nuk janë dërguar asnjëherë në Kosovë.
Të akuzuarit ngarkohen edhe me zbulimin e informacionit të klasifikuar pa leje. Ndërkohë, një person i katërt, i identifikuar me inicialet RM, akuzohet se ka ndihmuar në keqpërdorimin e pozitës zyrtare. Ministrja Hajdari e ka dënuar aktakuzën duke e quajtur një sulm të motivuar politikisht ndaj qeverisë dhe figurave të saj.
Kryeministri në detyrë, Albin Kurti, është thirrur si dëshmitar për këtë çështje, por ka refuzuar të paraqitet në Prokurori, duke shprehur gatishmëri të dëshmojë vetëm në ndërtesën e Kryeministrisë. Kurti ka deklaruar se sipas të gjitha informacioneve që zotëron, nuk ka korrupsion dhe as keqpërdorim të fondeve në këtë rast.
Ky proces ka rrënjë në ngjarjet e vitit 2023, kur tre persona u arrestuan pas dyshimeve se mallrat e porositura për rezervat shtetërore nuk ishin sjellë kurrë në vend. Po atë vit, në Ministrinë e Industrisë u kryen kontrolle të gjera pas publikimit të incizimeve që ngritën dyshime për menaxhimin e procesit të blerjeve. Hajdari në atë kohë mbrojti veprimet e ministrisë, duke thënë se procedurat ishin ndjekur sipas ligjit, ndërsa akuzoi policinë për sekuestrimin e dokumenteve të klasifikuara.
