Pas tre muajsh nga udhëtimi i saj i fundit në Shtetet e Bashkuara, ku mori pjesë në ceremoninë e inaugurimit të Donald Trump, Giorgia Meloni është gati për të udhëtuar sërish për në Uashington. Kjo vizitë pritet të ndodhë rreth datave 15 ose 16 prill, periudhë e cila përkon me ardhjen e Zv. Presidentit JD Vance në Romë. Por, krahasuar me atmosferën e ngrohtë të vizitës së mëparshme, tani klima mes dy shteteve është dukshëm më e tensionuar.
Në janar, Meloni, si e vetmja kryeministre e një vendi të BE-së, udhëtoi në Shtëpinë e Bardhë me një optimizëm të madh, duke shpresuar në nisjen e një periudhe të re bashkëpunimi mes Italisë dhe SHBA-ve. Por kësaj rradhe, qëllimi i saj është të frenojë pasojat e detyrimeve të vendosura nga Trump për importet nga Evropa, që janë bërë një shqetësim për ekonominë italiane.
Një nga objektivat kryesore të Melonit është të bindë presidentin amerikan të ulë tarifat ndaj BE-së, nga 20% në 10%, një masë e ngjashme me atë të Mbretërisë së Bashkuar. Për këtë qëllim, kryeministrja italiane mund të ofrojë koncesione të ndryshme në tavolinë për të lehtësuar tensionet dhe për të shmangur dëmet e mundshme ekonomike.
Pavarësisht presionit që ka nga komuniteti ndërkombëtar, Meloni ka lënë të kuptohet se nuk do të heqë dorë nga dialogu me Trump, duke shprehur një mesazh të qartë pas shpalljes së tarifave: “Kemi një problem tjetër që duhet ta zgjidhim, por nuk është katastrofa që disa po e përshkruajnë.” Ky qëndrim tregon se Meloni kërkon të ruajë marrëdhëniet me administratën amerikane, ndërsa punon për të gjetur një zgjidhje të qëndrueshme për këtë çështje.
Takimi i mundshëm me Trump gjatë Pashkëve ka gjithashtu një rëndësi të madhe për imazhin e Kryeministres italiane. Pas datës 18 prill, kur Zv. Presidenti Vance pritet të vizitojë Italinë, Meloni do të përballet me një sfidë të re për të forcuar pozitat e saj si lidere e përgjigjes europiane ndaj tarifave të Trump. Financial Times e ka cilësuar këtë përgjigje si “vendimtare” për të ardhmen e marrëdhënieve transatlantike.
Një takim i drejtpërdrejtë me Trump do të ishte një mundësi e shkëlqyer për Melonin për të diskutuar çështjet më të nxehta të axhendës ndërkombëtare. Në të kaluarën, ajo ka pasur mundësinë të takohet me Trump edhe para inaugurimit të tij, kur vizitoi Mar-a-Lago për të zhbllokuar situatën me çështjen e Cecilia Sala. Ajo ishte ndaluar në Teheran dhe u lirua si pjesë e një marrëveshjeje për inxhinierin iranian Mohammed Abedini. Vizita e asaj periudhe solli rezultate pozitive dhe ndihmoi në zgjidhjen e disa ngërçeve diplomatike.
Në këtë kontekst, është e qartë se për Melonin, takimi me Trump nuk është vetëm një mundësi për të zgjidhur çështjet ekonomike, por edhe një mundësi për të rritur kredibilitetin e saj si lider i fuqishëm në arenën ndërkombëtare.
